کراچی سمیت سندھ بھر میں میٹرک کے امتحانات کا آغاز 

محکمہ تعلیم کے مطابق سندھ بھر میں نویں اور دسویں جماعت کے 7 لاکھ 26 ہزار 979 طلبہ امتحانات میں شرکت کریں گے ۔ امتحانات کے لیے کراچی، حیدرآباد، سکھر، لاڑکانہ، میرپورخاص اور نواب شاہ ڈویژن میں 1312 امتحانی مراکز قائم کئے گئے ہیں۔

تعلیمی بورڈ  کے مطابق  کراچی  شہر میں تین لاکھ ساٹھ ہزار سے زائد طلبا شریک ہورہے ہیں  ، کراچی کے اٹھارہ ٹائونز میں 448 امتحانی مراکز قائم کیے گئے ہیں ۔ 

کراچی ثانوی تعلیمی بورڈ کے تحت نویں اور دسویں جماعت کے سائنس گروپ کے طلباء کا آج کمپیوٹراسٹڈیز کا امتحان لیا جائے گا ، جبکہ  دسویں جماعت جنرل گروپ کے طلباء جنرل سائنس کا امتحان دیں گے-

شہید بینظیرأباد انٹر میڈیٹ سکینڈری بورڈ کے تحت نویں اور دسویں جماعت کے سالانہ امتحانات میں طلبہ و طالبات نویں  جماعت میں اردو اور سندھی کا پرچہ دینگے۔ 

بینظیرأباد ڈویژن میں کل 143 امتحانی مراکز قائم کیے گئے ہیں جن میں 86 ہزار طلبہ امتحانات دیں گے ۔ 

حکومت سندھ کی جانب سے امتحانی مراکز کے اطراف دفعہ 144 نافذ کی گئی ہے  جبکہ امتحانی مراکز میں موبائل کے استعمال پر پابندی عائد ہے۔