ہم کفایت شعاری پر سختی سے عمل کریں گے:وزیر اعظم

سماجی رابطے کی ویب سائیٹ ٹوئیٹر پر جاری پیغام میں وزیر اعظم شہباز شریف نے کہا کہ لگژری سامان کی درآمد پر پابندی کےفیصلے سے ملک کے قیمتی زرمبادلہ کی بچت ہوگی۔

انہوں نے کہا کہ مالی طور پر آسودہ حال لوگوں کواس قومی مہم میں ایک مثال بننا ہوگا تاکہ ہم وطنوں کو مہنگائی کی اس آگ سے بچایا جاسکے جو پی ٹی آئی حکومت جلا کر گئی ہے۔

لگژری سامان کی درآمد پر پابندی کےفیصلے سے ملک کے قیمتی زرمبادلہ کی بچت ہوگی۔ہم کفایت شعاری پر سختی سے عمل کریں گے۔ مالی طور پر آسودہ حال لوگوں کواس قومی مہم میں ایک مثال بننا ہوگا تاکہ مالی مسائل کا شکار ہم وطنوں کو مہنگائی کی اس آگ سے بچایا جاسکے جو پی ٹی آئی حکومت جلا کر گئی ہے

— Shehbaz Sharif (@CMShehbaz) May 19, 2022

واضح رہے کہ حکومت نے معاشی ایمرجنسی کی بنیاد پر لگژری آئٹمز کی درآمد پر پابندی عائد کر دی ہے۔

حکومتی ترجمان مریم اورنگزیب نے بتایا کہ پاکستان کی تاریخ میں پہلی دفعہ تمام لگژری آئٹمز کو بین کیا جا رہا ہے، تمام وہ آئیٹمز جو لگژری آئٹمز ہیں جن کو غیر ضروری کہا جاتا ہے ان کی امپورٹ پر مکمل پابندی لگا دی گئی ہے، بین کی گئی چیزوں میں فوڈ آئیٹمز، تزئین و آرائش کی چیزیں اور تمام قسم کی امپورٹڈ گاڑیاں شامل ہیں۔

انہوں نے بتایا کہ حکومت کی جانب سے میک اپ، ٹشو پیپرز،جیم، جیولری، چمڑا، چاکلیٹ، جوسز، سگریٹ سمیت بڑی گاڑیوں اور موبائل فونز کی درآمد پر مکمل پابندی لگا دی گئی ہے، علاوہ ازیں امپورٹڈ کنفیکشنری، کراکری، فرنیچر، فش، فروزن فوڈ، فروٹ، ڈرائی فروٹ کی امپورٹ پر بھی پابندی عائد کردی گئی ہے۔