آئی ایم ایف سے معاہدہ ملک کے بہترین مفاد میں ہوگا : وزیر خزانہ

تفصیلات کے مطابق  عالمی مالیاتی فنڈ کے ساتھ مذاکرات کیلئے آج دوحہ روانگی سے پہلے کراچی میں صحافیوں سے گفتگو کرتے ہوئے مفتاح اسماعیل  نے کہا کہ اعانت کے خاتمے اور پٹرولیم مصنوعات پر ٹیکس لگانے کی سخت شرائط سابق حکومت کے آئی ایم ایف کے ساتھ معاہدوں کا نتیجہ ہیں۔

وزیر خزانہ نے کہا کہ سابق حکومت کے معاہدوں کے مطابق ڈیزل کی قیمت 150 روپے فی لیٹر اور پٹرول کی قیمت سو روپے لیٹر تک بڑھائی جانا ہے تاہم موجودہ حکومت ایسا نہیں چاہتی کیونکہ اس کے نتیجے میں عوام پر بھاری مالی بوجھ پڑے گا۔

انہوں نے کہا کہ عمران خان نے ہمیشہ ملک کی ترقی کی راہ میں رکاوٹیں پیدا کیں، انہوں نے کہا کہ عمران خان کے 2014 کے دھرنے کی وجہ سے چین کے صدر نے پاکستان کا دورہ منسوخ کیا اور آج آئی ایم ایف کی ٹیم نے جس نے مذاکرات کیلئے اسلام آباد آنا تھا عمران خان کے دھرنے کی وجہ سے دورے سے پاکستان آنے سے انکار کردیا ہے ۔

وزیر خزانہ نے امید ظاہر کی کہ اگلے دو دن میں ہم ملک اور عوام کے بہترین مفاد میں آئی ایم ایف کے ساتھ معاہدہ کرنے میں کامیاب ہوجائیں گے۔

دوسری جانب پاکستان اور آئی ایم ایف کے درمیان پالیسی مذاکرات آج شروع ہوں گے ، تکنیکی سطح کے مذاکرات سیکرٹری خزانہ کی سربراہی میں وفد نے مکمل کرلیے ہیں۔