عمران خان نے پورے پاکستان میں نفرت کی آگ پھیلا دی ہے : وزیر اعلیٰ پنجاب حمزہ شہباز

وزیر اعلیٰ پنجاب حمزہ شہباز نے شہید پولیس اہلکار کی نماز جنازہ کے بعد میڈیا سے گفتگو میں کہا کہ جاں بحق کانسٹیبل کے 5 بچے ہیں اور میں نے بچے کی آنکھوں میں آنسو دیکھے ہیں۔ عمران خان پولیس اہلکار کے بچے کی شکل دیکھ لو۔ گزشتہ روز جو فیصلہ کیا وہ ایک پاکستانی کی سوچ تھی اور بطور شہری قوم سے پوچھتا ہوں کہ یہ کون سی سیاست ہے؟ خونی مارچ ہو گا یہ کیا پیغام دے رہے ہیں۔

انہوں نے کہا کہ عمران خان کس کو دھمکیاں دے رہے ہیں وہ آئین اور قانون کا قتل کرنے چلے تھے۔ کہتا تھا قانون اور آئین کا تماشا بنا لو لیکن میری انا کو بچالو اور آج پاکستان کی معیشت سسکیاں لے رہی ہے۔

حمزہ شہباز نے کہا کہ عمران خان نے پھر 126 دن والا تماشا لگانے کا اعلان کیا۔ ماضی میں 52 ارب کے منصوبوں کا افتتاح ہونا تھا اور عمران خان کی وجہ سے چینی صدر پاکستان نہ آسکے۔

انہوں نے کہا کہ آئینی حکومت پر کہا کہ اس سے اچھا تھا ملک پر ایٹم بم گر جاتا۔ میں سیاسی آدمی ہوں انتقام نہیں لوں گا اور ہر بار یہی بات کرتا رہا ہوں کہ قانون حرکت میں آئے گا۔ جلسے جلوس کرو لیکن سیاست کی آڑ میں انتشار کی اجازت نہیں ہو گی اور اگر جمہوریت کے لبادے میں ملک پر حملہ کیا تو قانون حرکت میں آئے گا۔

وزیر اعلیٰ پنجاب نے کہا کہ انتقام کی آگ میں عمران خان بہت دور چلے گئے اور عمران خان نیوٹلرز کہہ کر کس کو سنا رہے ہیں؟ پاکستان بنانا ری پبلک نہیں کہ الیکشن تمہاری مرضی کا ہو۔ عمران خان نے بھوک و افلاس کےعلاوہ عوام کو کیا تحفہ دیا ہے ؟ جس کے سینے میں دل نہیں اسے انسان کہنے پر شرم آتی ہے۔

انہوں نے کہا کہ افواج پاکستان، رینجرز اور سیکیورٹی اداروں کے شہدا کو سلام کرتا ہوں۔ عمران خان نے اداروں کے خلاف زہراگلا اور آئین پاکستان ملک کے تحفظ کے لیے حرکت میں آئے گا۔ مری میں 21 لوگ سردی سے مر گئے لیکن عمران خان کو وہاں جانے کی توفیق نہیں ہوئی۔

حمزہ شہباز نے کہا کہ یہ خونی مارچ کی دھمکیوں سے کس کو ڈرا رہے ہیں جبکہ پی ٹی آئی نے 2014 میں رات کی تاریکی میں ریڈ زون پر حملہ کیا تھا۔ عمران خان کو شرم نہیں آتی کہ بہن، بیٹیوں کا نام کیسے لینا ہے۔

انہوں نے کہا کہ 2 ماہ ہو گئے لیکن معلوم نہیں گورنر کب آئے گا جبکہ کل آئی ایم ایف سے مذاکرات ہو رہے ہیں اور انہوں نے 25 مئی کولانگ مارچ کا اعلان کر دیا۔ انہوں نے پورے پاکستان میں نفرت کی آگ پھیلا دی ہے اور عمران خان نے اپنے کارکنوں میں نفرت کا بیج بویا ہے۔ ریاست مدینہ کے جھوٹے دعویدار کو شرم آنی چاہیے۔