عمران خان کنٹینر پر صوابی کیلئے روانہ

تفصیلات کے مطابق وزیر اعلیٰ خیبرپختونخوا محمود خان اور مراد سعید بھی عمران خان کے ساتھ ہیں۔پی ٹی آئی کا قافلہ  منزل کی جانب رواں دواں ہے ۔

سماجی رابطے کی سائٹ ٹوئٹر پر جاری  بیان میں شہباز گل نے کہا کہ عمران خان ولی انٹر چینج سے حقیقی آزادی مارچ کو لیڈ کریں گے۔ انہوں نے کہا کہ تمام کے پی کے غیور عوام ولی انٹر چینج پہنچیں۔

اپوزیشن لیڈر سندھ اسمبلی حلیم عادل شیخ پی ٹی آئی رہنما عثمان ڈار مردان پہنچ  گئے ، عثمان ڈار نے کہا کہ ساڑھے تین سال میں انہوں  نے تین لانگ مارچ اور دو دھرنے دیئے، ہم نے کبھی کسی کو پر امن احتجاج کرنے سے نہیں روکا، پوری قوم کو آج نکلنا ہے عمران خان کچھ لمحے میں نکلیں گے۔

اس سے قبل پاکستان تحریک انصاف کے چیئرمین عمران خان کی جانب سے کے پی کے سے اسلام آباد کی جانب لانگ مارچ کے آغاز کا اعلان ویڈیو پیغام میں دیا تھا ۔

دوسری جانب  پاکستان تحریک انصاف کے لانگ مارچ کے سبب ملک بھر مختلف مقامات پر شاہراہوں کی بندش کا سلسلہ جاری ہے، لاہور میں کارکنان اور پولیس آمنے سامنے آگئے ہیں۔

واضح رہے کہ گزشتہ روز وزیراعظم شہباز شریف کی زیر صدارت سیاسی کمیٹی کے ہونے والے اجلاس میں پاکستان تحریک انصاف کے لانگ مارچ کو روکنے کا فیصلہ کیا گیا،اجلاس میں اس بات کا عزم کیا گیا کہ ہر غیر قانونی کام کا راستہ روکا جائے گا۔