مسلم لیگ ق میں اختلافات کا معاملہ، چودھری شجاعت کا اہم فیصلوں کیلئے میٹنگ بلانے کا فیصلہ

ذرائع کے مطابق خاندانی اجلاس میں چوہدری شجاعت حسین ، پرویز الٰہی ، وجاہت حسین ،مونس الہی ، حسین الہی اور سالک حسین سمیت خاندان کے دیگر افراد شرکت کریں گے   ۔ چوہدری خاندان کے تینوں بڑے مسلم لیگ ق کے آئندہ مستقبل کے حوالے سے فیصلہ کن ملاقات کریں گے ۔

اس اجلاس میں ق لیگ حتمی فیصلہ کرے گی کہ کس کی حمایت اور کس کی مخالفت کرنی ہے ۔ 

مسلم لیگ ق کے  خاندانی  اجلاس کے بعد پارٹی اجلاس بھی  بلایا جائے گا ، ارکان قومی و صوبائی اسمبلی اور پارٹی تنظیم کا بھی جلد اجلاس بلانے کا فیصلہ کیا گیا ہے ، چوہدری شجاعت حسین اور چوہدری سالک حسین کے شہباز حکومت کی حمایت کی وجہ سے مسلم لیگ ق کی قیادت اختلافات کا شکار ہے۔

ذرائع کے مطابق چوہدری پرویزالہی ،چوہدری مونس الہی اور حسین الہی سیاسی الائنمنٹ تحریک انصاف کے ساتھ رکھنا چاہتے ہیں ، جبکہ مسلم لیگ ق کے ایم این اے حسین الہی بھی شہباز حکومت کی حمایت کے معاملے چوہدری شجاعت اورسالک حسین کے فیصلے کے مخالف ہیں۔ حسین الہی مستقبل کی سیاست میں ایم این اے مونس الہی کے ساتھ ملکر فیصلے کرنا چاہتے ہیں۔

گزشتہ روز چوہدری وجاہت حسین کے بیٹے حسین الٰہی نے بھی خاندانی پارٹی کو خیر باد کہہ کر مستقبل کی سیاست کا فیصلہ مونس الٰہی کی صوابدید پر چھوڑ دیا ہے ۔

قومی اسمبلی میں مسلم لیگ ق کے بیشتر ارکان کی حمایت چوہدری شجاعت حسین کو اور  پنجاب اسمبلی میں چوہدری پرویز الٰہی کو حاصل ہے۔