رمیز راجا کو مزید کام کرنے کیلئے وقت دیں : توقیر ضیا  ء

تفصیلات کے مطابق لیفٹیننٹ جنرل (ر) توقیر ضیاء نے کہا کہ پاکستان اس وقت مشکل حالات سے گزر رہا ہے ، کرکٹ اہم نہیں ، میرا مشورہ یہ ہے پیٹرن ملک کے حالات کو دیکھیں نہ کہ کر کٹ کو، لیکن کرکٹ کا کوئی بہت ہی بیڑہ غرق کر رہا ہو تو ضرور تبدیل کریں، اس وقت ایسا نہیں ، اس لیے حکومتی لوگوں، سینیٹرز اسمبلی ممبران کو ملکی حالات کی طرف توجہ دینی چاہیے کرکٹ کو چلنے دیں ، اس کی فکر نہ کریں۔

توقیر ضیاء نے کہا کہ مجھے  رمیز راجہ کی پہلی پریس کانفرنس یاد ہے ، اس میں جو انہوں نے کہا اسی کے مطابق چل رہے ہیں، لیکن اس موقع پر ڈیپارٹمنٹ کرکٹ کا معاملہ الگ ہے ، اس کو آپ ابھی چھیڑ نہیں سکتے، جو آئین میں لکھا ہے آپ کو اس کے مطابق چلنا ہے۔

سابق چیئرمین نے کہا کہ میں نے بھی اخبار میں یہ خبر پڑی تھی کہ میں نے رمیز راجا کے لیے کسی سے دو ہفتوں کے لیے مزید کام کرنے دینے کی سفارش کی ہے۔

انہوں نے سوال کیا کہ کیا میں نے رمیز راجا کے لیے کسی سے دو ہفتوں کے لیے سفارش کرنا تھی، میں نے کسی سے سفارش کرنا ہوتی تو تین برسوں کے لیے کرتا اور میں نے سفارش کرنا کس سے تھی پیٹرن تو عمران خان تھے جو وزیر اعظم نہیں رہے اور میری کیا ویلیو ہے مجھے فوج اور کرکٹ سے ریٹائر ہوئے 20 برس ہو چکے ہیں۔

توقیرضیاء نے کہا کہ پہلے شکایت یہ ہوتی تھی کہ چئیر مین  کرکٹر نہیں ، اب تو کرکٹر آیا ہے ، رمیز پاکستان کرکٹ کو جانتا ہے ، کپتان رہا ہواہے ، ڈیپارٹمنٹ  کھیلا ہوا ہے ، رمیز جانتے ہیں کہ گراس روٹ لیول سے کرکٹ کو کیسے اوپر لے کر جانا ہے ،  مجھے امید ہے کہ رمیز راجا کے ہوتے ہو ئے  اکیڈمیز کی سطح پر اچھا کام ہو گا۔  نجم سیٹھی کو بھی تین برس مکمل کرنے چاہیئں  تھے ، سب کا اپنا ویژن ہے۔