پنجاب میں ضمنی انتخاب :چیف الیکشن کمشنر کی پولنگ میں رکاوٹ ڈالنے والوں کیخلاف قانونی کارروائی کی ہدایت

تفصیلات کے مطابق چیف الیکشن کمشنر نے ڈسٹرکٹ ریٹرننگ افسران، ریٹرننگ افسران اور مانیٹرنگ افسران سے ٹیلیفونک رابطہ کیا۔ انہوں نے افسران کو ہدایت کی کہ وہ 20 حلقوں میں ضمنی انتخابات کو شفاف اور غیرجانبدارانہ بنانے کی ہر ممکن کوشش کریں اور اس حوالہ سے کسی قسم کا دبائو خاطر میں نہ لائیں۔

چیف الیکشن کمشنر نے کہا کہ الیکشن اور پولنگ کے عمل میں رکاوٹ ڈالنے والے عناصر کے خلاف بلا امتیاز قانونی کارروائی کی جائے۔

ڈسٹرکٹ مانیٹرنگ ٹیمیں صورت حال کی لمحہ بہ لمحہ رپورٹ الیکشن کمیشن بھجوائیں ۔

چیف الیکشن کمشنرنےڈسٹرکٹ مانیٹرنگ آفیسرز کو چوکنا رہنے اور ضابطہ اخلاق کی خلاف ورزی پر فوری کارروائی کرنےکا حکم دیا۔

واضح رہے کہ الیکشن کمیشن نے پنجاب اسمبلی کی 20 خالی نشستوں پر  17 جولائی کو ضمنی الیکشن کرانے کا اعلان کر رکھا ہے ۔ الیکشن کمیشن کے مطابق پنجاب اسمبلی کے جن حلقوں میں ضمنی انتخابات ہوں گے ان میں پی پی 7 راولپنڈی، پی پی 83 خوشاب، پی پی 90 بھکر، پی پی97 فیصل آباد، پی پی 125، پی پی127 جھنگ، پی پی 140 شیخوپورہ، پی پی 158، پی پی 167، پی پی 168، پی پی 170 لاہور پر ضمنی الیکشن ہو گا۔

اس کے علاوہ پی پی 202 ساہیوال، پی پی 217 ملتان، پی پی 224، پی پی 228 لودھراں، پی پی 237 بہاولنگر، پی پی 272، پی پی 273 مظفر گڑھ، پی پی 282 لیہ اور پی پی 288 ڈی جی خان پر ضمنی الیکشن ہو گا۔

 ضمنی الیکشن کے لیے کاغذات نامزدگی 4 سے7 جون تک  جبکہ کاغذات نامزدگی کی جانچ پڑتال 11 جون کو اور الیکشن ٹریبونل اپیلوں پر فیصلہ 21 جون تک کیاجائےگا ۔ 

اعلامیے کے مطابق کاغذات نامزدگی 23 جون تک واپس لیے جا سکیں گے اور امیدواروں کو انتخابی نشان 24 جون کو جاری ہوں گے۔