معاشی بحالی کے لیے مشکل فیصلے کرنے پڑے تو کریں گے:وزیر اعظم

تفصیلات کے مطابق وزیر اعظم شہباز نے وفاقی کابینہ کے اجلاس کے بعد میڈیا سے گفتگو میں کہا کہ ہم نے بہت مشکل وقت میں حکومت سنبھالی، پچھلی حکومت سے ہمیں معاشی بحران ملا، معاشی بحالی کے لیے مشکل فیصلے کرنے پڑے تو کریں گے۔

وزیر اعظم کا کہنا تھا کہ پیٹرولیم مصنوعات کی قیمتوں میں اضافہ ناگزیر تھا،دل پر پتھر رکھ کر پیٹرول کی قیمت میں اضافہ کیا،سابقہ حکومت نے پٹرولیم مصنوعات کی قیمتوں میں اضافہ روکا اور تحریک انصاف کی حکومت آنے والی حکومت کے لیے جال بچھا کر گئی۔

اس سے قبل وزیر اعظم شہباز شریف کی زیرصدارت وفاقی کابینہ کے اجلاس میں 7 نکاتی ایجنڈے پر غور کیا گیا، اجلاس جس میں جی ایس پی پلس اسٹیٹس سے متعلق بریفنگ دی گئی۔

وفاقی کابینہ کو ٹریڈ آرگنائزیشن ایکٹ کے تحت اپیل پر بھی وفاقی کابینہ کو بریفنگ دی گئی، اجلاس میں ملکی اور بین الاقوامی سکوک بانڈز کے اجرا کی منظوری بھی ایجنڈے میں شامل تھی۔

وفاقی کابینہ کو مختلف امور پر ویزہ پالیسی میں تبدیلی سے متعلق آگاہی دی گئی اور کورونا سے بچاؤ کے انجیکشن ریمیڈیسور کی قیمت میں کمی بھی ایجنڈے کا حصہ تھی، وفاقی کابینہ کے اجلاس میں اقتصادی رابطہ کمیٹی کے فیصلوں کی توثیق بھی کی گئی۔