لیجنڈ فٹبالر میراڈونا کی موت: سرجن سمیت ڈاکٹر، نرسز کو مقدمے کا سامنا

بیونس آئرس: ارجنٹینا کے لیجینڈ فٹبالر ڈیاگو میراڈونا کی اچانک موت کے معاملے پر غفلت برتنے کے جرم میں سرجن سمیت ڈاکٹرز اور نرسز کو مقدمات کا سامنا کرنا پڑے گا۔

ارجنٹینا کی مقامی عدالت نے فیصلہ سنایا ہے کہ طبی عملے پر ممکنہ طور پر جانتے بوجھتے قتل کے الزام میں مقدمہ چلایا جائے گا، استغاثہ کا کہنا ہے کہ ان کی دیکھ بھال پر مامور افراد نے انہیں گھر پر فراہم کی جانے والی طبی نگہداشت کے دوران ان کی قسمت پر چھوڑ دیا تھا۔

مقدمے میں نامزد افراد میں نیورو سرجن، سائیکائٹرسٹ اور سائیکالوجسٹ کے علاوہ دیگر ڈاکٹر اور نرسیں شامل ہیں جو میراڈونا کی دیکھ بھال کے فرائض سرانجام دے رہے تھے۔

قبل ازیں ارجنٹائن کی پراسیکیوشن محکمے نے سرجن لیئوپولڈو لُوک کی رہائش گاہ اور کلینک کی تلاشی لی گئی تھی، تفتیش کے دوران ڈاکٹر نے بتایا تھا کہ میراڈونا کے دماغ کی ایک شریان میں خون جم گیا تھا جس کا آپریشن کرنا ضروری تھا۔

دوسری جانب مقدمے کی تاریخ کا تاحال اعلان نہیں کیا گیا ہے، لیجنڈ فٹبالر نومبر 2020ء میں انتقال کرگئے تھے۔