پنجاب حکومت کا 11 ٹول پلازے ختم کرنے کا فیصلہ

تفصیلات کے مطابق وزیر اعلیٰ پنجاب حمزہ شہباز کی زیر صدارت کابینہ کے چوتھے اجلاس میں 11 ٹول پلازوں کو ختم کرنے کی منظوری دے دی گئی ہے۔

اجلاس میں وزیر اعلیٰ حمزہ شہباز نے قیدیوں کی سہولت کے لیے قیدیوں کی وینز ہوا دار بنانے کی ہدایت کی، اجلاس میں پنجاب کابینہ نے گندم ریلیز پالیسی میں 2 ماہ توسیع کرتے ہوئے کابینہ کمیٹی برائے گندم تشکیل دینے کی منظوری دی جس کے سربراہ صوبائی وزیر خوراک ہوں گے۔

پنجاب کابینہ نے سیالکوٹ بائی پاس پر واقع گوجرانوالہ سیالکوٹ روڈ ٹول پلازہ، وزیر آباد بائی پاس پر وزیر آباد سیالکوٹ کشمیر روڈ ٹول پلازہ، ضلع قصور میں کھڈیاں خاص کے مقام پر واقع قصور دیپالپور روڈ ٹول پلازہ،مریدکے کے مقام پر مریدکے نارووال روڈ ٹول پلازہ، شیخوپورہ میں برج اٹاری کے مقام پر قائم لاہور جڑانوالہ فیصل آباد روڈ ٹول پلازہ، موڑ کھنڈا کے مقام پر لاہور، جڑانوالہ، فیصل آباد روڈ ٹال پلازہ ختم کرنے کی منظوری دی ہے۔

علاوہ ازیں اجلاس میں پرونشنل اسمبلی آف دی پنجاب استحقاق بل 2022ء اور پرونشنل اسمبلی آف دی پنجاب سیکرٹریٹ سروس بل 2022ء کی بھی منظوری جبکہ پنجاب کابینہ کے دوسرے اجلاس کے فیصلوں کی توثیق بھی کی گئی ہے۔