ٹیکساس : لاوارث ٹرک سے 46 تارکین وطن کی لاشیں برآمد

غیرملکی میڈیا کے مطابق ٹرک میں موجود  چار بچوں سمیت 16 افراد کو  اسپتال منتقل کردیا گیا ہے، زندہ بچ جانے والوں کا جسم بہت گرم تھا اور وہ ہیٹ سٹروک اور گرمی سے نڈھال حالت میں تھے جبکہ  ٹرک میں پانی بھی موجود نہیں تھا۔ 

پولیس نے کارروائی کرتے ہوئے تین مشتبہ افراد کو حراست میں لے لیاہے ۔ 

سان انتونیو کے فائر چیف نے صحافیوں کو بتایا کہ ہنگامی امداد فراہم کرنے والے اہلکار ایک لاش ملنے کی اطلاع کے بعد تقریباً  6 بجے (مقامی وقت) جائے وقوعہ پر پہنچے ۔

ان کا کہنا تھا کہ ہم میں سے کسی نے سوچا بھی نہیں تھا کہ ہم کام پر آئیں گے اور ایک ٹرک کھولیں گے جس سے لاشوں کے ڈھیر ملیں گے۔

انھوں نے بتایا کہ گاڑی کو اس کا ڈرائیور چھوڑ کرغائب ہو گیا تھا اور اس میں کوئی ایئرکنڈیشن کام نہیں کر رہا تھا اور نہ اس کے اندر پینے کا پانی موجود تھا۔ 

ٹیکساس میں واقع سان انتونیو کا علاقہ، امریکہ اور میکسیکو کی سرحد سے تقریباً 250 کلومیٹر (150 میل) کے فاصلے پر ہے اور انسانی سمگلروں کے لیے ایک اہم روٹ ہے ۔

انسانی سمگلر امریکہ میں بنا دستاویزات کے داخل ہونے والے تارکین وطن کو منتقل کرنے کے لیے ایسے ٹرک  کا استعمال کرتے ہیں۔

واضح رہے کہ امیگریشن امریکہ میں ایک متنازعہ سیاسی مسئلہ ہے اور گذشتہ برس میکسیکو سے ملک میں داخل ہونے والے بنا دستاویزات والے تارکین وطن کی  بڑی  تعداد کو حراست میں لیا گیا تھا۔