ہم فیصلہ کن وقت پر کھڑے ہو گئے ہیں:عمران خان

ضمنی الیکشن کے حوالے سے کہوٹہ میں منعقدہ جلسہ عام سے خطاب میں سابق وزیراعظم عمران خان نے کہا کہ اںتخابات میں دھاندلی کے لیے ’مسٹرایکس‘ لاہور میں موجود ہے، واضح کردوں کہ لاہور کے مسٹر ایکس دھاندلی کر کے بھی نہیں جیت سکتے، مجھ پر 15 ایف آئی آرز درج کردی گئیں، ہزاروں مقدمے بھی درج کرلیں میں آصف زرداری، نواز شریف، ’چیری بلوسم اور حمزہ ککڑی‘ کو نہیں مانوں گا، ہم چوروں کو تسلیم نہیں کریں گے۔

سابق وزیر اعظم نے کہا کہ میں نے امریکہ کو کہا کہ ہم جنگ میں آپ کے ساتھ شرکت نہیں کریں گے، ہماری حکومت کا روس جانے کا مقصد صرف عوام کو ریلیف فراہم کرنا تھا، امپورٹڈ حکومت آنے کے بعد پیٹرول کی قیمت 100 روپے فی لیٹر اور ڈیزل کی قیمت میں پیٹرول سے بھی زیادہ اضافہ ہوا، 45 فیصد گیس کی قیمتوں میں اضافہ کیا گیا۔

اپنے خطاب میں عمران خان کا کہنا تھا کہ لوٹے ہر جگہ 3 ہی نعرے سنیں گے "لوٹے، چور، غدار" ایک وقت تھا لوٹوں کو چھانگا مانگا لے جاتے تھے، مگر لوٹے یہ نہیں جانتے کے وقت بدل گیا ہے، نواز شریف سزا یافتہ اور ملک سے باہر بیٹھا ہے، اگریہ مسلط رہے توہم ترقی نہیں کرسکتے۔

انہوں نے کہا کہ یہ سیاست نہیں ہے، ہم اپنی حقیقی آزادی کی جنگ لڑ رہے ہیں، ملک کی خاطرہم جان بھی قربان کرنےکو تیارہیں، چیف الیکشن کمشنر جو مرضی کر لیں ہم ان چوروں کو شکست دیں گے، لاہور میں مسٹر ایکس بیٹھا ہے جو دھاندلی کرنے کی پوری پلاننگ کر رہا ہے، میں نے صاف شفاف الیکشن کرانے کے لیے ای وی ایم لانے کی کوشش کی، ان سب نے مل کر ای وی ایم نہیں آنے دی، یہ ہمیشہ جعلی ووٹوں سے جیتتے ہیں، ہم نے ہر طرح سے دھاندلی کو روکنا ہے۔

سابق وزیر اعظم نے کہا کہ پنجاب کے ضمنی الیکشن میں پاکستان کے مستقبل کا فیصلہ ہوگا، ضمنی الیکشن میں ایک ، ایک لوٹے کو شکست دیں گے، ضمنی الیکشن کے بعد جب فیصلہ آئے گا تو حمزہ شہباز کو جانا ہو گا، آصف زرداری اور نواز شریف 30 سال سے ملک کو لوٹ رہے ہیں، فضل الرحمان اسلام کی بات کرتے ہیں لیکن اپنا ضمیر ڈیزل پرمٹ پر بیچتے ہیں۔