وزیراعلی ٰ کا انتخاب : ڈپٹی ا سپیکر اور پیپلز پارٹی کے وکلا کی دلائل دینے سے معذرت

تفصیلات کے مطابق چیف جسٹس عمر عطاء بندیال کی سربراہی میں سپریم کورٹ کا 3 رکنی بینچ درخواست کی سماعت کر رہا ہے، جسٹس اعجازالاحسن اور جسٹس منیب اختر بھی بینچ میں شامل ہیں۔

 سپریم کورٹ میں ڈپٹی سپیکر کی رولنگ پر درخواست کی سماعت شروع ہوئی تو ڈپٹی سپیکر اور حکومتی اتحاد کے وکلا نے دلائل دینے سے معذرت کر لی۔

ڈپٹی سپیکر دوست محمد مزاری کے وکیل عرفان قادر نے کہا کہ ’مجھے میرے موکل نے بائیکاٹ کا کہا ہے ، حکومتی اتحاد کے وکیل فاروق ایچ نائیک نے عدالت کو بتایا کہ ’ہمیں بھی بائیکاٹ کی ہدایت کی گئی ہے۔‘

اس پر چیف جسٹس نے ریمارکس دئیے کہ اصل سوال یہ تھا کہ ارکان کو ہدایات کون دے سکتاہے ،  آئین پڑھنے سے واضح ہے کہ ہدایات پارلیمانی پارٹی نے دینی ہیں ، مزید کسی قانونی دلیل کی ضرورت نہیں ۔  یہ ایسا سوال نہیں تھا کہ اس پر فل کورٹ تشکیل دی جاتی، فریقین کے وکلا کو بتایا تھا کہ آئین گورننس میں رکاوٹ کی اجازت نہیں دیتا ۔  

چیف جسٹس نے کہا کہ 1988 میں صدرکی سربراہی میں نگران کابینہ سپریم کورٹ نے کالعدم قراردی تھی ۔ ستمبر سے پہلے ججز دستیاب نہیں ،  فل کورٹ کی تشکیل کیس لٹکانے سے زیادہ کچھ نہیں تھا ۔

چیف جسٹس نے کہا کہ  اس کیس کو جلد مکمل کرنے کو ترجیح دیں گے، فل کورٹ بنانا کیس کو غیر ضروری التوا کا شکار کرنے کے مترادف ہے، فل کورٹ بنتا تو معاملہ ستمبرتک چلا جاتا کیونکہ عدالتی تعطیلات چل رہی ہیں۔

انہوں نے مزید کہا کہ گورننس اور بحران کے حل کیلئے جلدی کیس نمٹانا چاہتے ہیں ، آرٹیکل63 اے کی تشریح میں کون ہدایت دے گا یہ سوال نہیں تھا، تشریح کے وقت سوال صرف انحراف کرنے والے کے نتیجے کا تھا۔

گزشتہ روز سپریم کورٹ نے فل کورٹ بنانےکی درخواست مستردکردی تھی جس کے بعد حکمران اتحاد نے عدالتی کارروائی کے بائیکاٹ کا اعلان کیا تھا۔