فل کورٹ بنانے میں عدلیہ کی تکریم ہے : عطا تارڑ 

تفصیلات کے مطابق مسلم لیگ (ن) کے رہنما عطاتارڑ پریس کانفرنس سے خطاب کرتے  ہوئے کہا کہ حمزہ شہباز واضح اکثریت سے وزیراعلیٰ منتخب ہوئے ،  یہ انتہائی اہم معاملہ ہے جو فل کورٹ کےبغیر حل نہیں ہوسکتا  ،  وزیراعلیٰ کے انتخاب میں عمران خان نے اپنے ارکان کو پرویز الہٰی کو ووٹ دینے کا کہا۔ 

انہوں نے کہاکہ یہ ہدایات عمران خان نے پارٹی سربراہ کےطور پر جاری کی تھیں مگر جب ایسی ہی ہدایات مسلم لیگ (ق) کےسربراہ چوہدری شجاعت نےجاری کیں تو معیار بدل گیا۔

انہوں نےکہا کہ رن آف الیکشن 186ووٹ حاصل نہ کرنے پر کرایا جاتاہے،  رن آف الیکشن تب ہوتا ہے جب کوئی بھی امیدوار مجوزہ 186 ووٹ لینے میں ناکام رہے، سمجھ نہیں آتی اسی حلقے کا ایک ووٹ کم کیا جارہا ہے، اور اسی کا دوسرا ووٹ شامل کیا جاتا ہے ، ہم نے 179 ووٹ نہیں لیے ، ہماری گنتی 197 کی تھی اس میں سے 25 ووٹ کم کیے گئے، دو چٹھیوں میں سے وہ چٹھی مقدم ٹھہری جو عمران خان نے لکھی تھی۔

عطا تارڑ  نے کہا کہ چوہدری شجاعت حسین کےخط پر اعتراض کیا جاتاہے مگرعمران خان کا خط معتبر سمجھا جاتاہے یہی وجہ ہے کہ لوگ انصاف کے دوہرے معیار پرسوال اٹھا رہے ہیں۔

ان کاکہنا تھا کہ بارایسوسی ایشن کےسابق صدور نے بھی سوال اٹھایا کہ دوہرا معیار کیوں ہے؟۔ ترامیم میں درج ہے کہ پارٹی سربراہ ہی ہدایات جاری کرسکتاہے۔ 

عطااللہ تارڑ نے کہا کہ نواز شریف کےمعاملے پر پارٹی سربراہ کےکردارپر روشنی ڈالی گئی تھی، پارٹی سربراہ کی ہدایات اگر مقدم نہیں ہیں تو کیا ضمنی الیکشن کالعدم قراردیا جائےگا؟ ۔  انہوں نے کہاکہ ماضی میں چیئرمین سینیٹ کےالیکشن کے موقع پر بھی 7ووٹ مسترد کیے گئے اور کہاگیا کہ پریذائیڈنگ افسر کی رولنگ کو چیلنج نہیں کیا جاسکتا۔

عطاتارڑ نے مزید کہا کہ عمران خان محاذآرائی اور گالم گلوچ کی سیاست کرتاہے،ہم عوام کی حالت بہتر کرنے کیلئے ہرممکن کوشش کررہے ہیں ۔