میں نے غداری نہیں کی ، جنہوں نے کی ان پر آرٹیکل 6لگائیں :صدر مملکت

تفصیلات کے مطابق صدر مملکت عارف علوی نے صحافیوں سے ملاقات میں گفتگو کرتے ہوئے کہا کہ بطور صدر مملکت میری پاس اختیار نہیں کہ میں کسی  سے کہوں کہ ڈائیلاگ کرو ، یہ تاثر غلط ہے کہ میرے وزیر اعظم سے تعلقات ٹھیک نہیں ہیں،  ان سے کئی ملاقاتيں ہوچکی ہيں ۔

ان کاکہنا تھا کہ تمام فریق راضی ہوں تو پریذیڈنٹ ہاوس کردار ادا کرسکتا ہے ، ڈائیلاگ اسی صورت ممکن ہے جب تمام فریق راضی ہوں۔

انہوں نے کہا کہ  بلاول بھٹو نے امریکا کے ساتھ تعلقات بہتر بنانے کی کوشش کی ہے ، امریکا پاکستان سے تعلقات ختم کرنا نہیں چاہتا ، غیر ملکی خط پر اگر تحقیقات کیں ہیں تو عوام میں لانا چاہئے۔

عارف علوی نے کہا کہ ای وی ایم ،نیب کی سمری پر میری عمران خان سے کوئی بات نہیں ہوئی، جب سے یہ حکومت آئی ہے اس نے مجھے 74سمریاں بھیجیں، جن میں سے 69 سمریاں اسی دن دستخط کرکے بھجوا دیں۔

ان کا کہنا تھا کہ ذاتی حیثیت میں سمجھتا ہوں کہ کلئیر مینڈیٹ بہت ضروری ہے وقت کوئی بھی ہو ، نیب ترمیمی بل، الیکٹرانک ووٹنگ مشین اور گرونرپنجاب سے متعلق سمریاں میں نے روکیں ، ان سمریوں کو روکنے پر مجھے کسی طرف سے کوئی دباو نہیں تھا۔

صدر مملکت نے کہا کہ میرے ذہن میں کچھ سوالات تھے اس لئے ان چند سمریوں کو میں نے روکا ، عمران خان سے واٹس ایپ پر بات ہوتی ہے،عمران خان سے آخری بات تب ہوئی تھی جب گورنر پنجاب کا ایشو ہوا تھا۔ 

جنرل قمر جاوید باجوہ کی ریٹائرمنٹ اور نئے آرمی چیف کی تقرری سے متعلق صدر مملکت نے کہا کہ آرمی چيف کی تقرری قبل از وقت کر دينے ميں کوئی حرج نہیں اور نہ ہی انہیں اس سلسلے میں کوئی اعتراض ہے۔