پنجاب میں میرا داخلہ بند کیا تو گورنر راج لگانے کیلئے یہ جواز کافی ہے : وزیرداخلہ 

تفصیلات کے مطابق وزیرداخلہ رانا ثنا اللہ نے اسلام آباد میں میڈیا سے گفتگو کرتے ہوئے کہا کہ تحریک عدم اعتماد کے بعد مسلم لیگ ن انتخابات میں جانا چاہتی تھی لیکن اتحادی جماعتوں اور کچھ محب وطن افراد کے کہنے پر حکومت سنبھالی کیونکہ ملک ڈیفالٹ کر رہا تھا، اگر پنجاب میں میرے داخلے پر پابندی لگی تو یہ گورنر راج کے نفاذ کا جواز ہو گا۔

ان کاکہنا تھا کہ گورنر راج کی سمری میرے پاس آگئی  ہے میں اس پہ کام کر رہا  ہوں ، وفاقی حکومت کا اپنا رول ہوتا ہے ، وفاقی حکومت کے پاس بڑے ادارے ہوتے ہیں  ، یہ کہنا کہ  حکومت یہاں تک محدو ہے بیوقوفانہ ہے۔ 

وفاقی وزیر نے کہا کہ کیا یہ حقیقت نہیں کہ حمزہ شہباز 197 ووٹوں سے وزیر اعلیٰ منتخب ہوئے تھے، فیصلہ آیا منحرف کا ووٹ نہ گنا جائے گا اور وہ ڈی سیٹ بھی ہوگا ، کبھی ایسا نہیں ہوتا لیکن فیصلہ دیا گیا، 25 ووٹ مائنس کر دیے گئے،قومی اسمبلی میں ووٹ گنے جانے کا فیصلہ اسی سپریم کورٹ نےابزرو کیا تھا ، گزشتہ روز سپریم کورٹ کے فیصلے کی رو سے وہ 25 لوگ بحال ہوگئے ہیں۔

رانا ثنا اللہ نے کہا کہ  سپریم  کورٹ کے فیصلے سے سیاسی صورتحال مزید خراب ہوئی ۔  کل کے فیصلے کےبعد میڈیا اور سوشل میڈیا پر جو گفتگو ہورہی  ہے اس پر افسوس ہے ،  کچھ معاملات ایسے ہیں جن سے ایسی گفتگو کو تقویت ملتی ہے اگر ایسی فضا معتبر اداروں مییں ہے تو ہم تباہی  کے دہانے پر جارہے ہیں۔ 

وفاقی وزیر نے کہا کہ ہم اپنے الفاظ محدود رکھتے ہیں ، عدلیہ کا احترام ہر معاشرے کے لئے لازمی امر ہے، معتبر، باعزت، غیر جانبدار عدلیہ ہر معاشرے کی بنیادی ضرورت ہے، ہمیں ان بنیادی سوالات پر پورے معاشرے کو مل کر غور کرنا چاہیے اور اپنی ذمہ داریوں کو پورا کرنا چاہیے۔

وفاقی وزیر داخلہ نے کہا کہ جب عدالتی فیصلے معاملات کو حل کرنے کی بجائے انہیں متازع کریں گے تو جو سیاسی عدم تعاون کی فضا پیدا ہو گی تو اس میں ڈالر چھلانگیں لگائے گا، آپ کی سٹاک ایکسچینج نیچے گرے گی، حالات خراب ہو گے، مہنگائی بھی ہو گی۔