اسپیکر پنجاب اسمبلی کیلئے سبطین خان کے نام کی منظوری

جی این این کے مطابق پنجاب اسمبلی میں  تحریک انصاف سبطین خان کو اسپیکر کے لئے انتخاب میں اتارے گی ،   سبطین خان کے نام کی منظوری عمران خان اور پرویزالہی ملاقات میں دی گئی ۔  نومنتخب وزیراعلیٰ پنجاب چوہدری پرویزالہیٰ بنی گالہ  میں  چیئرمین پی ٹی آئی عمران خان سے ملاقات کی ۔ ملاقات میں پنجاب میں نئی کابینہ کی تشکیل سےمتعلق مشاورت کی گئی۔

 عمران خان نے پرویز الہی کو وزیراعلی بننے پر مبارکباد دی، اور نومنتخب وزیراعلیٰ نے تحریک انصاف کی حمایت پر شکریہ ادا کیا۔ دونوں رہنماؤں میں اتفاق ہوا کہ صوبے کی عوام نے جو اعتماد کیا اس پر پورا اتریں گے۔

واضح رہے کہ گزشتہ روز سپریم کورٹ نے وزیراعلیٰ پنجاب کے انتخاب میں ڈپٹی اسپیکر کی رولنگ کالعدم قرار دیتے ہوئے چوہدری پرویز الٰہی کو وزیراعلیٰ پنجاب مقرر کردیا۔

سپریم کورٹ آف پاکستان کے تین رکنی بینچ نے وزیراعلیٰ پنجاب کے انتخاب کے دوران اسپیکر پنجاب اسمبلی کی ق لیگ کے 10 ووٹ مسترد کرنے کی رولنگ کو کالعدم قرار دے دیا۔

چیف جسٹس عمر عطاء بندیال نے 11 صفحات پر مشتمل فیصلہ سناتے ہوئے کہا کہ حمزہ شہباز شریف کا وزیراعلیٰ پنجاب کی حیثیت سے حلف غیر آئینی تھا۔