اپوزیشن لیڈر سندھ اسمبلی حلیم عادل شیخ گرفتار 

ترجمان کے مطابق تحریک انصاف کے رہنما اور اپوزیشن لیڈر سندھ اسمبلی  حلیم عادل شیخ کو جامشورو میں گرفتار کیا گیا ہے۔   

 حلیم عادل شیخ آج اینٹی کرپشن میں دائر مقدمے کیلئے  جامشورو میں اپنا بیان درج کروانے گئے تھے ، جہاں ان کو گرفتار کرلیا گیا ہے۔

زرائع اینٹی کرپشن کے مطابق  حلیم عادل شیخ پر تھانہ بولا خان کی 62 ایکڑ زمین کے جعلسازی سے کاغذات بنانے کا مقدمہ درج ہے، اینٹی کرپشن اسٹیبلشمنٹ جامشورو نے معاملے کی انکوائری کے بعد ایف آئی آر درج کی ہے۔ 

 زرائع اینٹی کرپشن کے مطابق حلیم عادل شیخ کی جانب سے زمین کے جھوٹے کاغذات پر بینک سے قرض لیا گیا، سرکاری زمین کے ریکارڈ میں ہیرا پھیری سے حلیم عادل شیخ نے زمین ایک شخص کے نام کرائی اور  بورڈ آف ریونیو اس زمین کے کھاتے منسوخ کرچکا ہے۔ 

واضح رہے کہ 6 جولائی کو بھی حلیم عادل شیخ کو لاہور سے گرفتار کیا گیا تھا ، حلیم عادل شیخ کو اینٹی کرپشن سندھ نے سرکاری زمین کے جھوٹے کاغذات بنانے کے الزام میں حراست میں لیا تھا۔