وقت آگیا ہے پاکستان پر مسلط  امپورٹڈ مصنوعی نظام کو ختم کیا جائے : اسد عمر  

تفصیلات کے مطابق مرکزی سیکریٹری جنرل پی ٹی آئی اسد عمر نے سوشل میڈیا پر جاری ایک بیان میں  کہا ہے کہ آج کل نظریں سیاست پر ہیں ، مگر معیشت کی بگڑتی صورتِ حال نہایت تشویش ناک ہے  ، حالات پہلے ہی خراب ہوگئے تھے اب دن بدن بگڑتے جارہے ہیں۔

انہوں نے کہا کہ پچھلے دو ہفتوں کے دوران زرِمبادلہ کے ذخائر میں 1.2 ارب ڈالرز کی کمی آئی ہے ، آج سے تقریباً ایک ماہ پہلے چین سے 2.3 ارب ڈالرز کا قرض لیا گیا ، چین سے لئے جانے والے 2.3 ارب ڈالرز کے قرض میں سے 2 ارب ڈالرز استعمال ہوچکے ہیں۔

اسد عمر نے کہا کہ نتیجہ یہ ہورہا ہے کہ روپے کی قدر میں اتنی تیزی سے کمی آرہی ہے جسکی تاریخ میں مثال نہیں ، جس دن سے عدم اعتماد کی تحریک آئی ہے ڈالر کے مقابلے میں روپیہ 62 روپے تک گر چکا ہے، اس کی وجہ سے ملک میں مہنگائی کا طوفان آچکا ہے۔

مرکزی سیکریٹری جنرل پی ٹی آئی  کا کہنا تھا کہ پچھلے دو ہفتوں میں روپے کی قدر میں کمی کے باعث آئندہ پٹرول ، بجلی اور ڈیزل کی قیمتوں میں اور اضافے کا سامنا ہوگا ، صورتحال اتنی خطرناک ہو چکی ہے کہ ضروری ادویات بنانے کیلئے خام مال کی ایل سی اس وقت نہیں کھل رہی ، عالمی منڈیوں کی صورتحال یہ ہے کہ موڈیز،  فِچ اور ایس این پی سب نے پاکستان کی درجہ بندی گرا دی ہے۔

 اسد عمر نے مزید کہا  کہ معیشت اتنی گہری کھائی میں گرنے والی ہے کہ اس سے نکلنے میں برسوں لگیں گے۔