آئی ایم ایف قرض پروگرام کی جلد فراہمی ، آرمی چیف کا امریکی نائب وزیرخارجہ سے رابطہ

 پاکستان کو معاشی بحران سے نکالنے  کے لیے پاک فوج کے سپہ سالا ر آرمی چیف جنرل  قمر جاوید باجوہ متحرک ہوگئے ۔ 

امریکی میڈیا کے مطابق  آرمی چیف جنرل قمر جاوید باجوہ نے  امریکی نائب وزیر خارجہ وینڈی شرمین  سے رابطہ کیا ہے۔  رابطے میں  آئی ایم ایف کی جانب سے پاکستان کے لیے 1.2 ارب ڈالرز قرض دینے کا عمل تیز کرنے سے متعلق گفتگو کی۔

رپورٹس  کے مطابق آرمی چیف نے امریکہ کو آئی ایم ایف سے قرضے کی جلد فراہمی بارے اپنا کردار ادا کرنے  اور آئی ایم ایف ایگزیکٹو بورڈ کا اجلاس جلد ازجلد بلانے پر زور دیا ۔ 

 ان کا کہنا تھا کہ وائٹ ہاؤس اور محکمۂ خزانہ آئی ایم ایف پر پاکستان کے لیے تقریباً 1 ارب 20 کروڑ ڈالرز کی فوری فراہمی کے لیے دباؤ ڈالے جو پاکستان کو دوبارہ شروع کیے گئے قرض پروگرام کے تحت ملنے والے ہیں۔

غیر ملکی میڈیا کے مطابق آرمی چیف معاشی بحران سے نکلنے کے لیے اس سے قبل خلیجی اور برادر اسلامی ممالک سعودی عرب، یو اے ای کے علاوہ چین اور دیگر دوست ممالک سے بھی رابطے کرکے ان سے تعاون کی درخواست کرچکے ہیں۔

واضح رہے کہ آئی ایم ایف نے 13 جولائی کو قرض کے لیے پاکستان کو ’اسٹاف لیول کی منظوری‘ دے دی تھی، لیکن یہ لین دین پاکستان کے لیے آئی ایم ایف کے 6 بلین ڈالر کے توسیعی فنڈ کی سہولت کا حصہ ہے۔