بجلی کی فی یونٹ قیمت میں 4 روپے سے زائد اضافے کا امکان

تفصیلات کے مطابق نیشنل الیکٹرک پاور ریگولیٹری اتھارٹی (نیپرا اتھارٹی) سی پی پی اے کی درخواست پر بدھ کو سماعت کرے گا، جاری اعلامیے کے مطابق اضافہ جولائی کی ماہانہ فیول ایڈجسٹمنٹ کی مد میں مانگا گیا ہے جس سے صارفین پر 65 ارب روپے سے زائد کا اضافی بوجھ پڑے گا۔

سی پی پی اے کے مطابق جولائی میں پانی سے35.17، کوئلے سے 12.74 فیصد ، ڈیزل سے 1.46 اور فرنس آئل سے 6.42 فیصد بجلی پیدا کی گئی، ڈیزل سے پیدا ہونے والی بجلی کی لاگت 27 روپے 88 پیسے فی یونٹ رہی جب کہ فرنس آئل سے 35 روپے 69 پیسے فی یونٹ بجلی پیدا کی گئی۔

اعلامیے میں مزید بتایا گیا ہے کہ جولائی کیلئے ریفرنس لاگت 6 روپے 28 پیسے فی یونٹ مقرر تھی، بجلی کی پیداواری لاگت 10 روپے 98 پیسے فی یونٹ رہی، جولائی میں کل 13 ارب 76 کروڑ یونٹس بجلی پیدا کی گئی۔