یہ تاثر غلط ہےکہ انگلینڈکی بی ٹیم پاکستان کے دورے پر آئی ہے: معین علی

نیشنل اسٹیڈیم کراچی میں پریس کانفرنس کرتے ہوئے انگلینڈ ٹیم کے قائم مقام کپتان معین علی کا کہنا تھا جونی بیریسٹو، جوفرا آرچر اور  بین اسٹوک انجری کی وجہ سے سیریز کا حصہ نہیں لیکن اس سے یہ تاثر دینا کہ پاکستان کے دورے پر انگلینڈ کی بی ٹیم آئی ہے غلط ہے۔

معین علی کا کہنا تھا کہ کرس ووکس اور مارک ووڈ لمبی انجری کے بعد آرہے ہیں، ہم اپنے فاسٹ بولر کو احتیاط سے استعمال کرنا چاہتے ہیں، جب فاسٹ بولر تیار ہوں گے تب انہیں میچ کھلائیں گے۔

انگلش ٹیم کےکپتان کا کہنا تھا کہ میری فیملی پاکستان سے ہے تو یہ میرے لیے اعزاز کی بات ہے، میرے دوست اور  فیملی میری کپتانی پرکافی فخر محسوس کرتے ہیں۔

نیشنل اسٹیڈیم کی پچ کے حوالے سے معین علی کا کہنا تھا کہ اب تک پچ کا معائنہ نہیں کیا لیکن کراچی کی کنڈیشنز کا اندازہ ہے،کچھ بولرز کی عدم دستیابی کے بعد یہ نوجوان کھلاڑیوں کے پاس موقع ہے کہ وہ اپنی صلاحیت دنیا کو دکھائیں۔

ان کا کہنا تھا کہ ہماری یہ ٹیم وائٹ بال کہ بہترین ٹیم ہے، جوز بٹلر کی انجری کے حوالے سے ابھی کچھ نہیں کہہ سکتے، ممکن ہے آخری دو میچز میں بٹلر ٹیم میں آجائیں،  ہم بٹلر کو ورلڈکپ کے لیے مکمل فٹ چاہتے ہیں ۔

معین علی کا مزیدکہنا تھا کہ انہیں نہیں لگتا کہ اسپنرز سے اتنا فرق پڑےگا، ثقلین کی ہم بہت عزت کرتے ہیں، جب وہ انگلینڈ کےکوچ تھے تو ہم نے ان سے بہت کچھ سیکھا۔