عالمی رہنما موسمیاتی تبدیلی کے مسئلے سے نمٹنے کیلئے عملی کام کریں :  وزیراعظم

تفصیلات کے مطابق گزشتہ روز نیویارک میں اقوام متحدہ کی جنرل اسمبلی کے 77ویں اجلاس سے خطاب کرتے ہوئے وزیراعظم شہبازشریف  نے کہا کہ اس آفت کے نتیجے میں ہونے والے نقصانات کے حوالے سے انصاف کی امید ہے جس میں ہمارا کوئی کردار نہیں ، جو کچھ پاکستان میں ہوا وہ پاکستان تک محدود نہیں رہے گی ۔ پاکستان نے گلوبل وارمنگ کا اس طرح شدید اور تباہ کن اثرات کبھی نہیں دیکھے ۔ پاکستان میں زندگی ہمیشہ کے لیے تبدیل ہوگئی۔

وزیراعظم نے کہا کہ اس بین الاقوامی چیلنج کی وجہ سے ہمارے گلیشیئرز تیزی سے پگھل رہے ہیں ،  ہمارے جنگلات جل رہے ہیں اور ہمارا درجہ حرارت تریپن ڈگری سینٹی گریڈ سے بڑھ رہا ہے جس کی وجہ سے ہم اس کرئہ ارض پر سب سے گرم مقام بن گئے ہیں۔

وزیراعظم  شہبازشریف نے کہا کہ پاکستان میں سیلابوں نے ایک کروڑ دس لاکھ افراد کو غربت کی لکیر سے نیچے دھکیل دیا جبکہ شہری علاقوں میں موسم کا مقابلہ کرنے والی تعمیرات میں بھی مشکلات ہیں۔وزیراعظم نے کہا کہ اس تباہ کن سیلاب کے نتیجے میں پندرہ سو افراد ہلاک ہوئے جن میں چارسو بچے بھی شامل ہیں۔

انہوں نے کہا کہ ابتدائی اندازے کے مطابق تیرہ ہزار کلومیٹر سڑکوں کو نقصان پہنچا ہے۔ تین سو ستر پل سیلاب میں بہہ گئے ہیں اور لاکھوں گھر تباہ ہوئے اور لاکھوں کو نقصان پہنچا ۔ دس لاکھ جانور ہلاک ہوئے اور چالیس لاکھ ایکڑ پر کاشت فصلیں بھی تباہ ہوئیں جس کے نتیجے میں عوام کو ذرائع آمدن سے بھی محروم ہونا پڑا۔ نقصانات کا پیمانہ اس قدر زیادہ ہے جس کا تصور نہیں کیا جا سکتا۔

وزیراعظم نے اقوام متحدہ کے سیکرٹری جنرل انتونیو گوتریس کے دورئہ پاکستان اور موسمیاتی پناہ گزینوں کے ساتھ وقت گزارنے اور ان کو تعاون اور مدد کی یقین دہانی کرانے پر ان کا شکریہ ادا کیا ۔ انہوں نے پاکستان کی اس مشکل وقت میں مدد کرنے اور اظہار یکجہتی کرنے والے دوست ممالک کا بھی شکریہ ادا کیا۔