جاپان کے لیجنڈ ریسلر انوکی 79 برس کی عمر میں انتقال کرگئے

 رپورٹس  کے مطابق عالمی شہرت یافتہ ریسلر  انوکی 20 فروری 1943 کوجاپان کے شہر یوکوہاما میں پیدا ہوئے  ۔ ان کا پیدائشی نام کینجی انوکی رکھا گیا تھا، جو بعد میں ریسلنگ کے شعبے میں اینتینو انوکی کے نام سے معروف ہوئے اور دین اسلام کی قبولیت کے بعد انوکی محمد حسین کے نام سے پہچانے گئے ۔   

وہ جاپانی عوام میں انتہائی مقبول تھے اور انکی وفات پر حکومت اور عوام افسردہ ہیں۔

انوکی کے ابتدائی  ریسلنگ کیریئر  کا آغاز 1960 کی دہائی میں ہوا ، ان کی شہرت 1976 میں اس وقت اور بھی بڑھ گئی جب  باکسنگ لیجنڈ محمد علی کے ساتھ ایک  میچ ہوا، جو کہ جدید دور کے مکسڈ مارشل آرٹس کے ماہر تھے ۔

انوکی  دو بار پاکستان کا دورہ کرچکے ہیں ، ان کاپہلا دورہ 1976میں ہوا اس وقت ہوا جب پاکستانی پہلوان اکرام نے انہیں چیلنج کیا اس سنسنی خیز مقابلے کو دیکھنے کیلئے50 ہزار شائقین نیشنل اسٹیڈیم کراچی پہنچے تھے۔

انوکی پاکستان اور پاکستانی عوام سے بہت محبت اور انسیت رکھتے تھے۔ وہ  17جون  1979 ء میں پاکستانی جھارا پہلوان سے شکست کے بعد پاکستان میں مقبول ہوئے تھے۔

انوکی نے جھارا پہلوان کی وفات کے بعد ان کے بھتیجے کو جاپان میں اپنی نگرانی میں تربیت دی تھی ۔ وہ پاکستان اور بھارت کے درمیان امن کے فروغ کے لیے واہگہ بارڈر پر امن واک کرنا چاہتے تھے۔

انہوں نے پاک جاپان دوستی کے60سال مکمل ہونے پر اپنا دوسرا دورہ کیاتھا، جس میں انہوں نے اپنے پہلے دورہ پاکستان اور کراچی اسٹیڈیم میں ہونےوالے میچ کی یاد یں تازہ کیں ۔ 

انوکی نے اپنا آخری میچ 4 اپریل 1998 کو ڈان فرائی کے خلاف لڑا تھا اور اسے 2010 میں WWE ہال آف فیم میں شامل کیا گیا تھا۔

1989 میں جب تک وہ ایک متحرک پہلوان تھے ، انوکی سیاست میں داخل ہوئے اور جاپانی ہاؤس آف کونسلرز کے لیے منتخب ہوئے تھے۔  وہ 4 دفعہ رکن پارلیمنٹ رہے۔ 

رپورٹس کے مطابق انوکی نے عراق امریکا جنگ کے دوران صدام حسین سے ذاتی تعلقات کی بنا پر درجنوں جاپانی شہریوں کو رہائی بھی دلوائی تھی ۔

1990 میں  انوکی نے دورہ کربلا کے دوران صدام حسین کی دعوت پر ہی اسلام قبول کیا جس کے بعد ان کا اسلامی نام محمد حسین انوکی رکھا گیا تھا۔