آئی ٹی سیکٹر کے حوالے سے ملک میں بے انتہا پوٹیشنل موجود ہے: وزیرِ اعظم

وزیرِ اعظم عمران خان  کی زیر صدارت ملک میں آئی ٹی سیکٹر کے فروغ کے حوالے سے اجلاس ہوا، اس اجلاس میں آئی ٹی ایکسپرٹ مسعود جبار، چئیرمین پی ٹی اے میجر جنرل (ر)عامر عظیم باجوہ نے  شرکت کی۔ چیئرمین اسپیشل ٹیکنالوجی زون اتھارٹی عامر ہاشمی، سی این آئی ٹی بی سید شبہات علی شاہ بھی موجود تھے۔

اجلاس میں آئی ٹی سیکٹر کے فروغ کے لئے مختلف قلیل، وسط اور طویل المدت اقدامات پر غور کیا گیا۔وزیر اعظم عمران خان کو بریفنگ میں بتایا گیا کہ  اس وقت آئی ٹی کے شعبے میں پانچ ارب ڈالر زرمبادلہ کمانے کا پوٹیشنل موجود ہے، سیکٹر منظم نہ ہونے اور سہولیات کے فقدان کی وجہ سے حاصل ہونے والا زرمبادلہ استعداد سے بہت کم ہے۔

وزیر اعظم عمران خان نے کہا کہ   ملک کے نوجوانوں کے پوٹیشنل کو بروئے کار لانے کے حوالے سے آئی ٹی سیکٹر کلیدی اہمیت کا حامل ہے،آئی ٹی سیکٹر کے حوالے سے ملک میں بے انتہا پوٹیشنل موجود ہے، کوویڈ کے دوران گھر سے بیٹھ کر کام کرنے کے حوالے سے آئی ٹی تعلیم یافتہ نوجوانوں کے لئے بے شمار مواقع پیدا ہوئے ہیں۔

وزیر اعظم عمران خان نے مزید کہا کہ حکومت آئی ٹی سیکٹر کے ماہرین خصوصاً فری لانسرز کو منظم کرنے کے حوالے سے ترجیحی بنیادوں پر اقدامات اٹھا رہی ہے، ایس ٹی زونز کا قیام آئی ٹی سیکٹر کے فروغ میں کلیدی کردار ادا کرے گا، آئی ٹی سیکٹر کے فروغ کے حوالے سے ٹائم لائنز پر مبنی قلیل، وسط اور طویل المدت حکمت عملی کو حتمی شکل دی جائے۔