سینئر صحافی ارشد شریف کا جسد خاکی پاکستان پہنچ گیا  ، تحقیقاتی ٹیم کینیا جائے گی

تفصیلات کے مطابق سینئر صحافی ارشد شریف کی میت لے کر غیر ملکی ایئر لائن کے طیارے نے رات 1 بجے اسلام آباد ایئر پورٹ پر لینڈ کیا ۔ ارشد شریف کی میت وصول کرنے کے لیے اُن کے اہل خانہ اسلام آباد ایئر پورٹ پر موجود تھے۔

اُن کی میت کو قائد اعظم انٹرنیشنل اسپتال کی مارچری میں رکھا گیا ہے۔ا رشد شریف کا پاکستان میں بھی پوسٹ مارٹم کروایا جائے گا۔دوبارہ پوسٹ مارٹم کی خبر کی تصدیق ان کی اہلیہ کی جانب سے کی گئی ہے ۔ 

اس حوالے سے ان  کے اہلخانہ کا کہنا ہے کہ وفاقی پولیس اور انتظامیہ پمز اسپتال میں پوسٹ مارٹم کے انتظامات کرے گی، اس سلسلے میں ڈاکٹرز کی 3 رکنی ٹیم تشکیل دی جائے گی۔

حکام کا کہنا ہے کہ سینئر صحافی ارشد شریف کی میت صبح کے اوقات میں پمز اسپتال منتقل کی جائے گی۔

دوسری جانب ارشد شریف کے قتل پر وزارت داخلہ نے 3 رکنی اعلیٰ سطحی کمیٹی تشکیل دے دی ہے ، کمیٹی میں ڈائریکٹر ایف آئی اے، ڈپٹی ڈائریکٹر آئی بی اور لیفٹننٹ کرنل شامل ہیں ، نوٹیفکیشن میں کہا گیا ہے کہ  ٹحقیقاتی ٹیم فوری طور پر کینیا جائے گی ، کینیا میں پاکستانی ہائی کمیشن تحقیقاتی کمیٹی کی معاونت کرے گا، کمیٹی اپنی تحقیقات مکمل کرکے وزارت داخلہ کو رپورٹ پیش کرے گی۔

 اس سے قبل ارشد شریف کی میت غیر ملکی ایئر لائن سے گزشتہ شب سوا 1 بجے نیروبی سے دوحا روانہ کی گئی تھی جس کے بعد میت کو دوحا سے دوپہر 3 بج کر 14 منٹ پر پاکستان روانہ کیا گیا۔

فیملی ذرائع کے مطابق ارشد شریف کی نماز جنازہ ( جمعرات )  دن 2 بجے شاہ فیصل مسجد میں ادا کی جائے گی جبکہ تدفین ایچ الیون کے قبرستان میں کی جائے گی۔

واضح رہے کہ ارشد شریف کو اتوار کی رات نیروبی مگاڈی ہائی وے پر شناخت میں مبینہ غلطی پر پولیس نے سر پر گولی مار کر  قتل کیا تھا۔