تعلیمی ادارے کھلیں گے یا بند رہیں گے؟ فیصلہ آج ہوگا

تفصیلات کے مطابق نیشنل کمانڈ اینڈ آپریشن سینٹر کے اس اہم اجلاس میں وفاقی وزیر تعلیم شفقت محمود، چاروں صوبوں کے صوبائی وزرائے صحت اور تعلیم بھی شرکت کرینگے جبکہ علما ئے کرام کی مشاورت سے رمضان المبارک کے ایس او پیز کا جائزہ بھی لیا جائے گا۔ اجلاس میں تعلیمی ادارے مزید بند رکھنے یا کھولنے سے متعلق اہم فیصلے متوقع ہیں ،  این سی اوسی اجلاس  میں امتحانات کی صورتحال کا بھی جائزہ لیا جائے گا جبکہ تعلیم اور صحت سے متعلق  ملک بھر کی صورتحال کا جائزہ لیکر فیصلہ کیا جائے گا۔ وزرائے تعلیم ، وزرائے صحت اوراین سی او سی حکام تعلیمی اداروں سے متعلق فیصلہ متفقہ کریں گے۔ خصوصی اجلاس میں علماء کی مشاورت کے پیش نظر رمضان ایس او پیز کا بھی جائزہ لیا جائے گا۔

پنجاب اور خیبر پختونخوا کے  مخصوص اضلاع میں 11 اپریل تک تعلیمی ادارے بند ہیں جبکہ سندھ حکومت نے ملک بھر میں 15 روز کے لیے آٹھویں جماعت تک  کے طلبا کیلئے اسکول بند رہیں گے۔

یاد رہے کہ 10مارچ کو  کورونا وائرس کی تیسری لہر کےدوران حکومت نے تعلیمی ادارے بند کرنے کا فیصلہ کیا تھا۔ اس ضمن میں لاہور، فیصل آباد، گوجرانوالہ، گجرات، ملتان، راولپنڈی اور سیالکوٹ میں 15 مارچ سے بہار کی چھٹیوں کا اعلان کیا گیا  جبکہ اسلام آباد کے تعلیمی ادارے بھی پیر سے دو ہفتے کے لیے بند کر دیے گئے ، اس کے علاوہ پشاور اور مظفر آباد میں بھی تعلیمی ادارے 15 سے 28 مارچ تک بند کر دیئے گئے تھے ۔ 6 ماہ کی طویل بندش کے بعد تعلیمی اداروں کو 15 ستمبر کو دوبارہ کھولا گیا تاہم وبا کی دوسری لہر کے باعث انہیں 26 نومبر کو دوبارہ بند کر دیا گیا تھا۔ یکم فروری سے ملک بھر کے تعلیمی اداروں میں سرگرمیاں بحال کی گئی تھیں اور حکومت نے تعلیمی اداروں میں کورونا ایس او پیز پر عملدرآمد لازمی قرار دیا تھا۔

خیال  رہے کہ پاکستان میں کرونا وائرس کا پہلا کیس 26 فروری 2020 کو ریکارڈ کیا گیا تھا ۔

واضح رہے کہ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید103 افراد چل بسے جس کے بعد اموات کی مجموعی تعداد 14 ہزار924ہوگئی ہےجبکہ  متاثرہ افراد کی مجموعی تعداد 6 لاکھ 96 ہزار 184 ہو گئی ہے ۔ ملک بھرمیں فعال کیسز کی تعداد63 ہزار 102ہے۔