گینز بک آف ورلڈ ریکارڈ نے بھی بھارتی ٹیم کا ’’توا‘‘ لگا دیا

 بھارت کی ٹی ٹونٹی ورلڈ کپ کے سیمی فائنل میں عبرتناک شکست کے بعد گینز بک آف ورلڈ ریکارڈ نے بھی بھارتی ٹیم کا ’’توا‘‘ لگا دیا ۔ میچ کے بعد گینز بک آف ورلڈ ریکارڈ کے ٹویٹر اکائونٹ سے پیغام میں کہا گیا کہ ’’ ورلڈ کپ کی تاریخ کی آسان ترین چیز‘‘۔ 

Easiest run chase in history? ?#INDvsENG

— Guinness World Records (@GWR) November 10, 2022

یاد رہے کہ ٹی ٹونٹی ورلڈ کپ کے دوسرے سیمی فائنل میں انگلینڈ نے بھارت کو 10 وکٹوں سے بدترین شکست دے کر فائنل کے لیے کوالیفائی کرلیا۔ 

بھارت کے 169 رنز کے تعاقب میں انگلش اوپنر ایلکس ہیلز کی جارحانہ نصف سنچری مکمل کی، انہوں نے صرف 28 گیندوں پر 50 رنز بنائے۔ انگلینڈ کے کپتان نے 36 گیندوں پر نصف سنچری سکور کی۔ دونوں بلے بازوں کی دھواں دار اننگز کا سلسلہ ہیں نہیں رکا، انہوں نے پورے میچ کے دوران بھارتی باؤلرز کو بے بس کیے رکھا اور میدان کے ہر طرف شاندار شارٹس کھیلے۔ 

 
انگلینڈ کی جانب سے کپتان جوز بٹلر 49 بالز پر 80 اور ایلکس ہیلز 47 گیندوں پر 80 رنز بنا کر ناٹ آؤٹ رہے۔

انگلینڈ کے لیے 47 گیندوں پر 80 رنز کی جارحانہ ناٹ آؤٹ اننگز کھیلنے پر ایلکس ہیلز کو پلیئر آف دی میچ قرار دیا گیا۔ اس سے قبل ایڈیلیڈ میں کھیلے جارہے میچ میں انگلش کپتان جوز بٹلر نے ٹاس جیت کر پہلے فیلڈنگ کرنے کا فیصلہ کیا، بھارت نے اننگز کا آغاز کیا تو دوسرے ہی اوور میں لوکیش راہل صرف پانچ رنز بنانے کے بعد کرس ووکس کی وکٹ بن گئے۔ 

روہت شرما کا ساتھ دینے ویرات کوہلی آئے اور دونوں کھلاڑیوں نے 47 رنز کی شراکت کی لیکن 56 کے مجموعے پر بڑا شاٹ کھیلنے کی کوشش میں روہت شرما وکٹ گنوا بیٹھے، انہوں نے 28 گیندوں پر 27رنز بنائے۔ سوریا کمار یادیو نے آنے کے بعد چند بڑے شاٹس کھیلے لیکن عادل رشید کی ایک گیند پر چھکا مارنے کی کوشش میں وہ فل سالٹ کو آسان کیچ دے بیٹھے، انہوں نے 10 گیندوں پر 14 رنز بنائے۔ 

تین وکٹیں گرنے کے بعد ہردک پانڈیا کی وکٹ پر آمد ہوئی اور انہوں نے ویرات کوہلی کے ہمراہ 61 رنز جوڑ کر اسکور کو 136تک پہنچا دیا۔ ویرات کوہلی نے ایک مرتبہ پھرنصف سنچری اسکور کی لیکن 40 گیندوں پر 50 رنز بنانے والے بلے باز کرس جورڈن کی وکٹ بن گئے۔ ہردک پانڈیا نے سیم کرن کے ایک اوور میں 20 رنز بٹور کر اپنی ٹیم کے بڑے سکور کی راہ ہموار کی۔ بھارت نے مقررہ اوورز پانچ وکٹوں کے نقصان پر 168 رنز بنائے، ہردک 33 گیندوں پر پانچ چھکوں اور چار چوکوں کی مدد سے 63 رنز بنانے کے بعد اننگز کی آخری گیند پر ہٹ وکٹ ہوئے۔ 

اس سے قبل برطانوی کپتان جوز بٹلر نے ٹاس جیتنے کے بعد کہا کہ کوشش ہوگی بھارت کو 150 رنز تک محدود رکھ کرکے میچ جیتنے کی کوشش کریں، انگلش کپتان نے کہا کہ ٹیم میں دو تبدیلیا کی گئی ہیں فل سالٹ اور کرس جارڈن کو پلئینگ الیون کا حصہ بنایا گیا ہے۔ اس موقع پر روہت شرما نے کہا کہ کوشش ہوگی انگلش ٹیم کی کمزوریوں کا فائدہ اٹھا کر ایونٹ کے فائنل کیلئے کوالیفائی کریں۔ 

قبل ازیں ٹی20 ورلڈکپ کے پہلے سیمی فائنل میں پاکستان نے نیوزی لینڈ کو 7 وکٹوں سے شکست دیکر ایونٹ کے فائنل کیلئے کوالیفائی کرلیا ہے۔ انگلینڈ کا سکواڈ کپتان جوز بٹلر، ایلکس ہیلز، فل سالٹ، بین اسٹوکس، ہیری بروک، لیام لیونگ اسٹون، معین علی، سیم کرن، کرس جارڈن، کرس ووکس اور عادل رشید پر مشتمل ہے جب کہ بھارتی سکواڈ میں کپتان روہت شرما، کے ایل راہول، ویرات کوہلی، سوریہ کمار یادو، رشبھ پنت، ہاردک پانڈیا، اکشر پٹیل، آر اشون، محمد شامی، بھونیشور کمار اور ارش دیپ سنگھ شامل ہیں ۔