صدربائیڈن کی چینی ہم منصب شی جن پنگ سے 14 نومبرکو ملاقات ہوگی

ترجمان وائٹ ہاؤس کے مطابق امریکی اور چینی صدور کے درمیان ملاقات انڈونیشیا کے جزیرے بالی میں جی 20 اجلاس کے دوران سائیڈ لائن پر ہوگی۔

وائٹ ہاؤس کے ترجمان نے دعویٰ کیا ہے کہ دونوں صدور ہونے والی ملاقات میں ممالک کے درمیان روابط بڑھانے کی کوششوں پر تبادلہ خیال کریں گے۔

صدر جوبائیڈن اور صدر شی جن پنگ کے درمیان ملاقات ایک ایسے وقت میں ہونے جا رہی ہے کہ جب دونوں ممالک کے درمیان تائیوان کے حوالے سے ماضی کی نسبت زیادہ کشیدگی پائی جا رہی ہے۔

واضح رہے کہ امریکی صدر جوبائیڈن کی چین کے صدر شی جن پنگ سے پہلی مرتبہ براہ راست ملاقات ہو گی۔ جوبائیڈن کو منصب صدارت سنبھالے ہوئے دو سال کا عرصہ گزر چکا ہے۔