چاہوں توعمران خان کی حکومت ایک دن میں گراسکتا ہوں : پرویزخٹک کا دعوی ٰ

تفصیلات کے مطابق وفاقی وزیر دفاع پرویز خٹک   نے نوشہرہ میں انتخابی  جلسے سے خطاب کرتے ہوئے کہا ہے کہ اگر میں چاہوں تو ایک دن میں عمران خان کی حکومت گراسکتا ہوں، لیکن مجھ پر  عمران خان  کے احسانات ہیں۔ان کا کہنا تھا کہ  آج سارے پاکستان سے  میں مقابلہ کر سکتا ہوں۔ اپوزیشن والے میری عزت کرتے ہیں،  نوشہرہ کے صوبائی اسمبلی کے ضمنی الیکشن میں میرے امیدوار کے مقابلے میں تمام اپوزیشن جماعتیں اور میرے رشتےداراکٹھے ہو گئے ہیں۔ لیکن  ان  سب کو ایک ساتھ گراؤں گا ۔

پرویزخٹک کا مزید کہنا تھا کہ میں  جب وزیراعلیٰ تھا تو اپنے رشتے داروں کو بھرتیوں اور ترقیاتی کاموں کے اختیارات دئیے  ، جن کو میں اختیارات دیتا ہوں وہ آ سمان پر پہنچ جاتے ہیں، اورواپس لوں   تو وہی لوگ صفر ہو جاتے ہیں ۔

واضح رہے کہ صوبائی اسمبلی کے حلقے  پی کے-63 نوشہرہ (کے پی) میں ضمنی انتخابات 19 فروری کو ہورہے ہیں ۔  الیکشن کمیشن نے سندھ کی تین اور بلوچستان، پنجاب اور خیبر پختونخوا اسمبلی کی ایک، ایک صوبائی نشست جبکہ قومی اسمبلی کے لیے پنجاب اور خیبر پختونخوا میں ایک، ایک نشست پر ضمنی انتخابات  کا اعلان کررکھا ہے ۔

دوسری جانب   اس بیان کے بعد پرویز خٹک نے سماجی رابطے کی ویب سائٹ ٹوئٹر پر ایک طرح   کا وضاحتی پیغام بھی کیا ہے ۔ ٹوئٹ میں پرویز خٹک  کاکہنا تھا  کہ نوشہرہ میں میرے گاؤں کے مقامی لوگوں سے خطاب میں واضح ذکر کیا کہ میں عمران خان کا مخلص اور احسان مند ہوں۔ ہماری کوششوں اور عمران خان کی حمایت سے ہم ہر علاقے میں کامیاب ہیں اور ہم ضمنی انتخاب کے لیے ہمارے حمایت یافتہ امیدوار کے مقابلے میں کھڑے ہونے والی تمام اپوزیشن جماعتوں کو شکست دیں گے۔

Clearly mentioned in my speech for the locals of my village in Nowshera that I’m sincere & indebted to Imran Khan.We are successful in our const. due to our efforts & support of IK. We will defeat all opp. parties ganged up against the candidate we are supporting for the by-elec.

— Pervez Khattak (@PervezKhattakPK) January 31, 2021

خیال رہے کہ پرویز خٹک موجودہ وزیر دفاع کے منصب پر فرائض انجام دے رہے ہیں اور ان کاشمار ان وزرا میں ہوتا ہے جن کا عمران خان کی حکومت کے دوران  منصب  تبدیل نہیں ہوا ہے ۔پرویز خٹک تحریک انصاف کی خیبرپختونخوا حکومت میں صوبے کے کے وزیراعلیٰ  بھی رہ چکے ہیں ۔