پٹرول بحران ، کابینہ کمیٹی کی رپورٹ پر حکومت کا بڑا فیصلہ

تفصیلات کے مطابق  پٹرول بحران، کابینہ کمیٹی کی رپورٹ پر وفاقی حکومت نے بڑا فیصلہ  کرلیا۔ پٹرولیم ڈویژن، اوگرا حکام، بورڈ آفسران اور آئل مارکیٹنگ کمپنیوں کے خلاف فوجداری کارروائی کی منظوری دے دی گئی  ۔ اوگرا کو بدعنوانی میں ملوث کمپنیوں کے خلاف سخت کاروائی کی ہدایت کردی گئی۔

ذرائع کے مطابق  کابینہ کمیٹی کی رپورٹ منظور کرلی گئی، پٹرولیم ڈویژن میں مانٹرینگ سیل قائم  کرنے کی ہدایت کردی گئی ۔  ایڈوزائری کمیٹی کے ڈیٹا پر انحصار ختم، نئی ٹیسٹنگ لیب کے قیام کی  بھی  ہدایت کردی گئی ۔

ذرائع کے مطابق  آئل مارکیٹنگ کمپنیوں کو عبوری لائسنس جاری کرنے پر بھی کارروائی کی ہدایت کی گئی ہے۔ غیرقانونی جوائنٹ وینچر اور غیرقانونی نجی اسٹوریج قائم کرنے بھی کارروائی ہوگی ۔ بحری جہازوں کی برتھنگ میں تاخیر کرنے والوں کو بھی سزا بھگتنا ہوگی۔

گزشتہ ماہ  پیٹرول بحران کی رپورٹ پر وزیر اعظم کی جانب سے ندیم بابر کو  عہدے سے مستعفی ہونے کی ہدایت کردی گئی تھی جبکہ سیکریٹری پیٹرولیم کو بھی  عہدے سے ہٹا کر  اسٹیبلشمنٹ ڈویژن بھیج دیا گیا تھا۔

واضح رہے کہ  گزشتہ سال   جون جولائی میں ملک میں پٹرول کی مصنوعی قلت پیدا ہوگئی تھی،  پٹرول بحران کے باعث قومی خزانے کو 25ارب روپے سے زائد نقصان پہنچاتھا۔ وفاقی حکومت نے پٹرول کی ذخیرہ اندوزی میں ملوث کمپنیوں کا پتا لگانے کے لیے انکوائری کمیشن بنایا تھا۔ تحقیقاتی کمیشن نے رپورٹ وزیراعظم کو پیش کردی تھی جس میں اوگرا کو ایکٹ آف پارلیمنٹ کے ذریعے تحلیل کرنے اور سیکریٹری پیٹرولیم کے خلاف کارروائی کی سفارش کی گئی تھی۔