"میں کلی کافی آں" فواد چوہدری کی اہلیہ کا پیشی کے موقع پر دبنگ انداز

 پاکستان تحریک انصاف کے رہنما فواد چوہدری کی گرفتاری کے بعد ان کی اہلیہ حبا فواد پیشی پر ان کے ہمراہ تھیں۔انہوں نے میڈیا سے گفتگو کرتے ہوئے دبنگ انداز اپناتے ہوئے کہا کہ میں کلی کافی آں۔

سابق وزیر اعلی پرویز الہی کی فواد چوہدری سے متعلق گفتگو پر فواد چوہدری کی اہلیہ نے کہا کہ پرویز الہی کا فون آیا ہے، انہوں نے بڑے پن کا مظاہرہ کیا۔ 

مونس الہی میرے بالکل بھائیوں کی طرح ہیں۔انہوں نے میڈیا کا بھی خصوصی شکریہ ادا کیا۔ حبا فواد نے جہلم سے آنے والے لوگوں کا بھی شکریہ ادا کیا اور کہا کہ وہ اس مشکل وقت میں ہمارے ساتھ کھڑے ہیں۔

جبکہ سابق وزیراعلٰی پنجاب چوہدری پرویز الٰہی نے فواد چوہدری کے بھائی فیصل چوہدری ایڈووکیٹ کو ٹیلی فون کیا،پرویز الٰہی نے گرفتاری کے حوالے سے بیان پر فواد چوہدری کے اہلِ خانہ سے معذرت کرتے ہوئے

کہا کہ فواد چوہدری اور انکے خاندان سے برسوں پر محیط احترام اور عقیدت کا رشتہ ہے،نادانستہ بیان سے فواد چوہدری اور اہلِ خانہ کے جذبات مجروح ہونے پر افسوس ہے،فواد چوہدری کی گرفتاری اور جھوٹے پرچے کا اندراج قابلِ مذمت ہے۔ 

انکا کہنا تھا کہ اپنے بیان پر معذرت خواہ اور فواد چوہدری اور اہلِ خانہ سے مکمل یکجہتی کا اظہار کرتا ہوں۔ فیصل چوہدری نے کہا کہ معذرت کرنا آپ کا بڑا پن ہے،

چوہدری صاحب ہمیں شرمندہ کر رہے ہیں،آپ بڑے ہیں میں اور میرا خاندان آپ کو بزرگ سمجھتے اور احترام کی نگاہ سے دیکھتے ہیں،ہم بطور خاندان آپ اور آپ کے اہلِ خانہ کی سلامتی کیلئے دعاگو ہیں۔

یاد رہے کہ گزشتہ روز سابق وزیراعلٰی پنجاب چوہدری پرویز الٰہی نے کہا کہ عمران خان کے قریبی چار پانچ لوگوں میں سے ایک تو پکڑا گیا ہے،پہلے پکڑا جاتا تو کام ٹھیک رہتا۔