ملتان سلطانز کو پی ایس ایل سے قبل دھچکا، دو اہم کھلاڑی دستیاب نہیں ہوں گے

پاکستان سپر لیگ 8 کا ایکشن 13 فروری سے شروع ہوگا، ملتان سلطانز اپنے ہوم گراؤنڈ پر لاہور قلندرز کے خلاف افتتاحی میچ کے ساتھ اپنی مہم کا آغاز کرے گی تاہم اس کے جارح مزاج بیٹر ٹم ڈیوڈ ابتدائی سات میچز میں ٹیم کو دستیاب نہیں ہوں گے، وہ مارچ کے پہلے ہفتے میں ٹیم کو جوائن کریں گے۔

ٹم ڈیوڈ نے ورک لوڈ منیجمنٹ کی وجہ سے ابتدائی میچز میں شرکت سے معذرت کی ہے۔

سلطانز کے سی ای او حیدر اظہر نے تصدیق کی کہ ٹم ڈیوڈ آخری تین گروپ میچز اور پلے آف مرحلے کیلئے دستیاب ہوں گے تاہم ملتان سلطانز نے ابتدائی میچز کیلئے ان کی جگہ کوئی متبادل پلیئر طلب نہیں کیا۔

ٹیم انتظامیہ کا مؤقف ہے کہ جب ڈیوڈ ملر آٹھ میچز کے بعد واپس روانہ ہوجائیں گے تو اس سلاٹ پر ٹم ڈیوڈ آجائیں گے اور جب تک ٹم نہیں اس سلاٹ پر ملر موجود ہوں گے۔

دوسری جانب وائین پارنیل گروئین انجری کا شکار ہوگئے ہیں، ملتان سلطانز ان کی فٹنس پر رپورٹ کی منتظر ہے تاہم خدشہ ہے کہ وہ ابتدائی میچز میں ٹیم کو دستیاب نہ ہوں۔

حیدر اظہر نے مزید تصدیق کی کہ رائیلی روسو اور کیرون پولارڈ مکمل پی ایس ایل کیلئے ٹیم کو دستیاب ہیں۔