بڑی صنعتوں کو پیداوار میں 4.40 فیصد کمی کا سامنا ہے

لاہور: ادارہ شماریات کے مطابق جولائی سے جنوری کے مہینوں کے دوران ملک کی 20 بڑی صنعتوں کی پیداوار میں کمی جبکہ بڑی صنعتوں کی مجموعی پیداوار میں 4.40 فیصد کمی ریکارڈ کی گئی۔

تفصیلات کے مطابق ملک میں صنعتی سرگرمیاں سست روی کا شکار ہیں جس کے باعث بڑے پیمانے پر مینوفیکچرنگ میں کمی واقع ہوئی ہے۔

بتایا جاتا ہے کہ جنوری 2022 کے مقابلے میں جنوری 2023 میں صنعتی پیداوار میں 7.90 فیصد کی کمی واقع ہوئی ہے، جبکہ ٹیکسٹائل سیکٹر یعنی معیشت کی ریڑھ کی ہڈی کی پیداوار میں اس عرصے کے دوران 13.21 فیصد کی کمی واقع ہوئی ہے۔

ادارہ شماریات کی رپورٹ میں بتایا گیا کہ گاڑیوں کی پیداوار میں 35 فیصد، مشینری کی پیداوار میں 52 فیصد، ادویات کی پیداوار میں 22 فیصد اور تمباکو کی پیداوار میں 21 فیصد کمی آئی ہے۔

لکڑی کی مصنوعات کی پیداوار میں 68 فیصد، پٹرولیم کی پیداوار میں 10 فیصد، مشروبات کی پیداوار میں 7 فیصد، ربڑ کی مصنوعات کی پیداوار میں 7.68 فیصد اور کھاد کی پیداوار میں 5.31 فیصد کی کمی واقع ہوئی۔

رپورٹ کے مطابق کمپیوٹر، الیکٹرانکس مصنوعات کی پیداوار میں بھی 23 فیصد کمی ہوئی تاہم گارمنٹس، چمڑے کی مصنوعات، فرنیچر اور فٹ بال کی پیداوار میں اضافہ ہوا۔