اسلام آباد: وزیرخزانہ و محصولات سینیٹر اسحاق ڈار نے کہا ہے کہ پاکستان کی ترقی، خوشحالی اور استحکام پارلیمانی نظام کے تسلسل اور مالیاتی نظم و نسق میں ہے، سینیٹ آف پاکستان وفاق کی علامت اور تمام اکائیوں میں اتحاد و یکجہتی کے لئے نمایاں کردار کا حامل ہے۔

سینیٹ کی گولڈن جوبلی کے موقع پر ہمیں ان صاحب بصیرت لیڈروں اور قانون سازوں کو بھی یاد رکھنا چاہیے جنہوں نے 1973 کا آئین دیا اور اس میں تمام صوبوں کو ایوان بالا میں رقبہ اور آبادی سے بالاتر ہو کر یکساں نمائندگی دی۔

بدھ کو ایوان بالا کی گولڈن جوبلی تقریبات کے سلسلہ میں منعقدہ خصوصی اجلاس سے خطاب کرتے ہوئے وزیر خزانہ نے کہا کہ سینیٹ کی 50 سالہ گولڈن جوبلی کی تقریبات کے موقع پر اظہار خیال میرے لئے اعزاز ہے جبکہ اس رنگا رنگ تقریب کے انعقاد پر چیئرمین سینیٹ اور ٹیم بھی مبارک باد کی مستحق ہے۔

انہوں نے کہا کہ پاکستان کے ایوان بالا کے 50 سال تاریخی سنگ میل ہیں۔ سینیٹ نے جمہوری اقدار کے استحکام، حقوق کے تحفظ اور تمام صوبوں کی مساوی نمائندگی میں اہم کردار اداکیا۔ سینیٹ کی 50 سالہ کامیابیوں کاذکر کرنے کے ساتھ ساتھ ہمیں اس ادارے کی مضبوط تاریخ اور توقعات کو بھی سامنے رکھنا ہوگا۔ انہوں نے کہاکہ وہ 20 سال سے اس ایوان کے ممبر ہیں۔

انہوں نے یہاں سے بہت کچھ بطور پارلیمنٹیرین بہت کچھ سیکھا ہے۔وہ اس ایوان کے کردار کے گواہ ہیں۔ 12 اکتوبر 1999 کے سیاہ دن سے قبل وہ دو بار قومی اسمبلی کے رکن رہے۔ وزیرخزانہ نے کہاکہ یہ قومی اور صوبائی قیادت کا غیر معمولی اجتماع ہے۔

اس منفرد تقریب میں شرکت اعزا ز ہے جو قومی سلامتی اور اتحاد کی علامت ہے۔ یہ ہائوس پاکستان کو بطور وفاق مستحکم بنانے میں نمایاں کردار کاحامل ہے۔

انہوں نے کہا کہ پارلیمنٹ بالخصوص ایوان بالا کو وفاق کے مرکز اور پارلیمانی و جمہوری حقیقی نمائندے کے طورپر بھی دیکھناہوگا۔ ہمیں اس صاحب بصیرت قیادت اور قانون سازوں کو بھی یاد رکھنا ہوگاجنہوں نے یہ آئین بنایا اور اس میں تمام صوبوں کی یکساں نمائندگی کے لئے ایوان بالا کا وجود دیا۔

انہوں نے کہا کہ ہمیں سینیٹ کی گوگولڈن جوبلی کے موقع پر مساوات ، اجتماعیت ، صوبائی خودمختاری اور ملک میں پارلیمانی جہوریت کے استحکام کے لئے بھی اپنے عزم کا اعادہ کرنا ہوگا۔

انہوں نے کہا کہ وفاقیت کو برقرار رکھنے اور دونوں ایوانوں کے درمیان طاقت کے توازن کے لئے سینیٹ کاکردار اہم ہے۔ یہ صوبوں کےدرمیان تنازعات کے حل کے لئے ایک اہم ادارہ ہے۔ اس موقع پر چیئرمین سینیٹ کی جانب سے وزیر خزانہ کو خصوصی شیلڈ د ی گئی