نیکٹا نے ٹی ایل پی کو کالعدم جماعتوں کی فہرست میں شامل کردیا

تفصیلات کے مطابق قومی ادارہ برائے انسداد دہشت گردی    ( نیکٹا ) نے کالعدم جماعتوں کی فہرست میں ٹی ایل پی کو 79 ویں نمبر پر شامل کردیا ۔ کالعدم تنظیموں کی فہرست میں شمولیت کے بعد تحریک لبیک پاکستان کو فنڈز دینے پر پابندی ہوگی، ٹی ایل پی کو خیرات، امداد دہشتگردوں  کی مالی معاونت کے مترادف ہوگی۔  نیکٹا، وزارت داخلہ نے ٹی ایل پی کے اثاثوں کے تعین کیلئے چیف سیکرٹریز کو خطوط بھجوا دیئے۔ جس میں کہا گیا کہ ڈپٹی کمشنرز کے ذریعے ٹی ایل پی کے اثاثوں کا تعین کیا جائے۔

خیال رہے  کہ کالعدم تحریک لبیک پاکستان (ٹی ایل پی ) کےبینک اکاؤنٹس اوراثاثےمنجمدکرنےکی کارروائی شروع کردی گئی ہے۔اثاثےمنجمدکیےجانےکی کارروائی انسداددہشتگردی ایکٹ1997کےتحت کی جارہی ہے۔کالعدم جماعت کےعہدیداروں،کارکنوں کوجاری اسلحہ لائسنسزبھی منسوخ کیےجائیں گے، کالعدم جماعت کےعہدیداروں کےشناختی کارڈاورپاسپورٹ بھی بلاک کیےجارہے ہیں، اثاثےمنجمدکرنےکیلئے اسٹیٹ بینک اورصوبائی محکمہ ریونیوکرداراداکریں گے۔

واضح رہے کہ وزارت داخلہ نے تحریک لبیک پاکستان ( ٹی ایل پی) کو کالعدم قرار دے دیا تھا۔ وزارت داخلہ کیجانب سے تحریک لبیک پاکستان پر پابندی کا نوٹیفکیشن جاری کردیا ہے۔ انسداد دہشت گردی ایکٹ 1997کے تحت تحریک لبیک پاکستان کو کالعدم قرار دیا گیا ہے۔

نوٹیفکیشن میں کہا گیا ہے کہ  تحریک لبیک پاکستان ملک میں دہشت گردی اور دوسرے گھناؤنے جرائم میں ملوث ہے۔ تحریک لبیک پاکستان  ملک میں لوگوں کواکسا کر انتشار پیدا کرنے میں ملوث ہے اس کے ساتھ ساتھ قانون نافذ کرنے والے اداروں کے اہلکاروں کی اموات اور زخمی کرنے میں بھی  ملوث ہے۔