پولیس عذاب الہیٰ کو دعوت دے رہی ہے،فواد چوہدری

پاکستان تحریکِ انصاف (پی ٹی آئی) کے رہنما فواد چوہدری نے کہا ہے کہ پولیس اور آئی جی اسلام آباد و پنجاب کو کہنا چاہتا ہوں کہ آپ عذابِ الہٰی کو دعوت دے رہے ہیں۔

Statement on Arrests of PTI workers pic.twitter.com/uq4j0S1fX1

— Ch Fawad Hussain (@fawadchaudhry) March 20, 2023

انہوں نے کہا کہ سیکڑوں کارکن پولیس کی تحویل میں ہیں، آپ نے دس 10سال کے بچے اپنی تحویل میں لئے ہیں، پولیس کی جانب سے عورتوں پر تشدد کیا گیا اورچادر اور چار دیواری کے تقدس کو پامال کیا گیا ہے۔

رہنما تحریک انصاف کا کہنا تھا  کہ تحریک انصاف کے لوگوں کا جرم یہ ہے کہ وہ سیاست کے لئے،  اپنے انسانی حقوق کے لئے اور پاکستان کیلئے جدوجہد کررہے ہیں، کیا یہ جرم ہے کہ ان کو راتوں کو اٹھا کر جیلوں میں ڈالا جائے، خاندانوں، بیگمات ، ماؤں اور بچوں کی تذلیل کی جارہی ہے۔

فواد چودھری نے کہا کہ جو آپ لوگ کررہے ہیں یہ پاکستان کے قانون و آئین کے منافی ہے، آپ اپنے سیاسی آقاؤں کو خوش کرنے کیلئے حد سے گزررہے ہیں، جیسے ہی ہم سیاست اور جلسے کی بات کرتے ہیں گرفتاریاں شروع ہوجاتی ہیں۔

پاکستان تحریکِ انصاف (پی ٹی آئی) کے رہنما فواد چوہدری کا کہنا تھا کہ الیکشن کمیشن آف پاکستان سے بات کرنے کا فائدہ ہی نہیں، الیکشن کمیشن کہتا ہے کہ ان کے ہاتھ میں کچھ نہیں ہے، یہاں کسی کے ہاتھ میں کچھ نہیں ہے۔