بینکنگ کورٹ : جہانگیر ترین اور علی ترین کی عبوری ضمانت میں توسیع

تفصیلات کے مطابق بینکنگ کورٹ کے جج امیر محمد خان نے  پی ٹی آئی رہنما جہانگیر ترین اور علی ترین کی عبوری درخواست ضمانت پر سماعت کی۔ جہانگیر ترین ارکان قومی و صوبائی اسمبلی کے ہمراہ پہلے سیشن عدالت پہنچے جہاں دونوں نے عدالت کے روبرو پیش ہو کر حاضری مکمل کروائی۔ دوران سماعت  وکیل جہانگیر ترین نے عدالت کو بتایا کہ 14 اپریل کو جہانگیر ترین اور علی ترین کو ایف آئی اے نوٹس ارسال کرتی ہے، ایف آئی اے نے جہانگیر ترین کے ڈیرہ فارمز سمیت تمام کاروبار کا ریکارڈ مانگ لیا۔ دوران سماعت وکیل نے موقف اپنایا کہ ایک دن کے نوٹس پر تمام چیزیں پیش کرنا ممکن نہیں تھا، امن و امان کی صورتحال کے باعث سب چیزیں پیش کرنا ممکن نہیں تھا، 19 اپریل کو ایف آئی اے میں پیش ہونگے۔ عدالت نے  آئندہ سماعت پروکلا کو عدالتی دائرہ اختیار پردلائل مکمل کرنے کی ہدایت کرتے ہوئے کیس کی سماعت 3 مئی تک ملتوی کر دی۔

سماعت کے بعد کورٹ کے باہر میڈیا سے گفتگو کرتے ہوئے جہانگیر ترین نے کہا میں اپنے تمام دوستوں کا مشکور ہوں، وہ رمضان میں بھی میرے ساتھ پیشی پر آتے ہیں۔انھوں نے کہا بار بار شوگر مافیا کا شور مچایا جاتا ہے ، اور مجھ پر شوگر مافیا میں شامل ہونے کا الزام لگایا جاتا ہے، لیکن  تینوں  ایف آئی آرز میں شوگر مافیا  کا ذکر نہیں، ان میں چینی کی قیمت بڑھنے کا بھی ذکر نہیں۔ ان کاکہنا تھا کہ  ایک فرضی کہانی بنائی ہوئی ہے،میرےتمام کاروبارشفاف ہیں، شوگر کا ان مقدمات کیساتھ کوئی تعلق نہیں، ساری زندگی ایک ہی طریقے سے کام کیا، پہلے کاروبار تھا بعد میں سیاست میں آیا، کارپوریٹ سیکٹر میں ایف آئی آر درج کرنا ایف آئی اے کا کام ہی نہیں، میں ایف آئی اے کے اقدام کو چیلنج کروں گا۔جہانگیر ترین نے مزید کہا کہ  میں نہیں کہہ رہا کہ کیس ختم کر دیں، لیکن اگر انصاف صحیح معنی میں ہوتا تو مجھ پر ایف آئی آر نہیں بنتی۔ میرے نام پر دھبہ لگانے کی کوشش کی جا رہی ہے جس کی مذمت کرتا ہوں۔

اس موقع پر ایم این اے راجہ ریاض نے میڈیا سے گفتگو کرتے ہوئے کہا کہ ریاست مدینہ میں تحریک انصاف کے  40 ارکان عمران خان سے انصاف مانگ  رہے ہیں، جہانگیر ترین سے نا انصافی ہو رہی ہے، اب اس بات کو آگے نہ بڑھائیں، ہم اب تک پی ٹی آئی کے پرچم تلے کھڑے ہیں، لیکن آخری بار انصاف مانگ رہے ہیں، نہ ملا تو فیصلہ کرنے پر مجبور ہوں گے۔ کچھ دوستوں کے کہنے پر اسی طرح کا رویہ رہا تو پھر ہم بھی کوئی قدم اٹھا سکتے ہیں، آج آخری بار کہہ رہے ہیں ہمیں انصاف چاہئے، اس کے بعدہم آئندہ کا لائحہ عمل ترتیب دیں گے۔

واضح رہے کہ جہانگیر ترین کی شوگر ملز جے ڈی ڈبلیو پر غیرقانونی طریقے سے پیسہ بنانے اور منی لانڈرنگ سمیت متعدد مقدمات درج ہیں۔31مارچ کو  ایف آئی اے  کی جانب سے تحریک انصاف کے رہنما  جہانگیر ترین اوران کے بیٹے  علی ترین   پر  منی لانڈرنگ اور فراڈ کے مقدمات درج کیے گئے تھے ۔ ایف آئی اے نے  سوا تین ارب روپے کے مالیاتی فراڈ  اور منی لانڈرنگ پر جہانگیر ترین اور فیملی کے دیگر افراد پر مقدمہ درج کیا۔ دوسرے مقدمہ میں جہانگیر ترین ، انکے بیٹے علی ترین اور دو بیٹیوں کے نام بھی شامل ہیں ۔ اس سے قبل جہانگیر ترین کے خلاف درج کیے گئے مقدمے میں ایف آئی اے نے 7 اعشاریہ 4 ملین ڈالرز کی منی لانڈرنگ کر کے رقم برطانیہ منتقل کرنے اور وہاں جائیدادیں خرید نے کا الزام عائد کیا تھا۔