فواد چوہدری کا رانا ثنا اللہ کے خلاف انسداددہشتگردی ایکٹ کے تحت مقدمہ درج کرانے کا اعلان

تفصیلات کے مطابق وفاقی وزیر اطلاعات فواد چوہدری نے میڈیا سے بات کرتے ہوئے کہا  کہ ایک جماعت کس طرح ریاست کی رٹ کو چیلنج  کرسکتی ہے ، پاکستان کی ریاست کمزور ریاست نہیں ہے یہ سوچنے کی کوئی غلطی نہ کرے ۔ گزشتہ روز رانا ثناءاللہ نے چیف سیکرٹری پنجاب ، کمشنر اور دیگر کو دھمکیاں دیں، سرکاری افسران کیخلاف دہشتگردوں والی زبان استعمال کی گئی ، انہوں نے وہ زبان استعمال کی جو کالعدم ٹی ایل پی اور بانی ایم کیو ایم استعمال کرتے تھے ، ریاست پاکستان ہر گز کمزور نہیں ، کسی کو سرکاری افسران کو دھمکیاں دینے کی اجازت نہیں دی جا سکتی ،رانا ثناءاللہ کیخلاف کارروائی کیلئے احکامات دیے جا رہے ہیں ۔

فواد چوہدری نے کہا کہ زخمیوں کی عیادت کیلئے آیا ہوں ، کل جمعہ کے دن انٹیرئیر منسٹری نے جیسے کہا کہ ہمیں سوشل میڈیا بند کرنا پڑا،  اس طرح کے واقعات میں کئی لوگ جو شامل ہوتے ہیں وہ حقیقی شامل ہوتے ہیں۔ پاکستان کی ریاست عظیم ریاست ہے اس کو آگے بڑھنا ہے، یہاں جو فیصلہ ہوا ہے یہ ہمارا اپنا ذاتی فیصلہ تھا ،کسی بین الاقوامی ملک نے ریاست نے ہم سے کسی ایسے فیصلے کا مطالبہ نہیں کیا۔   ان کاکہنا تھا کہ رسول ﷺ سے جو عشق کا معاملہ ہے اس میں کوئی دورائے نہیں ہے۔ رسول ﷺ کی ذات کے اوپر اپنے ذاتی مفادات کو کرنا ٹھیک نہیں، فتنہ پر حکومت نے احسن طریقہ سے قابو پایا ہے ۔ سکیورٹی فورسز نے اس فتنہ کو ناکام بنایا اس پر انہیں مبارک دیتے ہیں،  یہاں بھی جماعتیں ہیں ان کو پتہ بھی نہیں چلتا وہ کس کے ہاتھوں میں استعمال ہو رہی ہیں ۔ 

یاد رہے کہ  گزشتہ روز مسلم لیگ (ن) پنجاب کے صدر رانا ثناء اللّٰہ نے  شریف خاندان کی رہائش گاہ سے متعلق معاملے پر میڈیا بریفنگ میں  چیف سیکریٹری پنجاب، احتساب کے مشیر شہزاد اکبراور  کمشنر اور بورڈ آف ریونیو لاہور  کے عہدیداروں کو متنبہ کیا  تھا ۔ انہوں نے چیف سیکریٹری پنجاب کو مخاطب کرتے ہوئے کہا  تھا کہ آپ ریڈ لائن کراس نہ کریں، ریاست کے ملازم بنیں۔ چیف سیکریٹری پنجاب کل آپ کو جواب دینا ہوگا، آپ نے ادھر ہی رہنا ہے آپ کے بچے ادھر ہی ہیں۔ان کا کہنا تھا کہ آپ سلیکٹڈ ٹولے کے ہتھیار نہ بنیں،  نوٹس جاری کئے بغیر یہ کام نہیں کرسکتے تھے، انہیں تو شاید ادھر نہیں رہنا ان کے بچے ادھر نہیں، آپ نے تو رہنا ہے۔رانا ثنا اللہ نے کہا کہ اعلان کرتا ہوں آئندہ اس قسم کا غیرقانونی عمل برداشت نہیں کیا جائے گا، بھرپور مزاحمت کریں گے، نقصان کی ذمہ داری سلیکٹڈ حکومت کے احکامات پر عملدرآمد کرنیوالوں پر ہوگی۔