قومی اسمبلی کے سپیکر و ڈپٹی سپیکر کا سانحہ گیاری کے شہداء کو خراجِ عقیدت

اسلام آباد: قومی اسمبلی کے سپیکر راجہ پرویز اشرف اور ڈپٹی اسپیکر زاہد اکرم درانی نے سانحہ گیاری (سیاچن) کی شہداء کی 11 ویں برسی پر خراجِ عقیدت پیش کیا ہے۔

جمعہ کو اپنے الگ الگ بیانات میں انہوں نے کہا کہ برفانی تودہ گرنے کے باعث وطن کی حفاظت پر مامور جوانوں اور شہریوں کے جانی نقصان نے پوری قوم کو افسردہ کیا۔

وطن کے بہادر سپوتوں کی یاد آج بھی ہمارے دلوں میں تازہ ہے۔شہداء کے عزم و ہمت اور وطن پر قربان ہوجانے کے جذبے کو سلام پیش کرتے ہیں۔

اللّٰہ تعالیٰ تمام شہداء کے درجات بلند فرمائے۔ تاریخی ریسکیو آپریشن میں حصہ لینے والے پاک فوج کے جوانوں کے ہمت و حوصلے کی مثال نہیں ملتی۔ انہوں نے کہا کہ پوری قوم سکیورٹی اہلکاروں کی حفاظت کے لیے دعا گو ہے۔