سپریم کورٹ پریکٹس اینڈ پروسیجر بل پارلیمنٹ کے مشترکہ اجلاس سے منظور

اسپیکرراجہ پرویزاشرف کی زیرصدارت پارلیمنٹ کے مشترکہ اجلاس میں پارلیمنٹ نے سپریم کورٹ پریکٹس اینڈ پر وسیجر بل2023کی شق وارمنظوری دی۔ جماعت اسلامی کےسینیٹرمشتاق احمدخان کی ترمیم مسترد کردی گئی۔

وزیرقانون کا کہنا تھا کہ سپریم کورٹ پریکٹس اینڈ پروسیجر بل منظوری کیلئے صدر کو بھیجا تھا، صدر مملکت نے ایک پیغام کے ساتھ بل واپس بھیجا دیا ہے۔ جو سوالات صدر نے اٹھائے ہیں، اُن میں کچھ الفاظ نامناسب ہیں۔

اعظم نذیرتارڑ نے کہا کہ دونوں ایوانوں میں اس بل پر بحث ہوئی ، پہلے بھی مشورہ دے چکے، صدر پارٹی کارکن نہیں ملک کے سربراہ کے طور پرکام کریں۔ صدر مملکت نے کہا یہ قانون سپریم کورٹ کے اختیارات میں مداخلت ہے، ہم نے اختیار سپریم کورٹ کے ججز کو ہی دیا ہے۔

وزیرقانون کا کہنا تھا کہ ہم نے سپریم کورٹ کے اختیار میں اضافہ کیا ہے ، سپریم کورٹ کے معاملات میں شفافیت لائے ہیں ، اس قانون کو سراہا گیا اور کہا گیا کہ یہ قانون پہلے آنا چاہیے تھ، سپریم کورٹ کے رولز آمر کے دور میں بنائے گئے تھے، ون مین شو کا اثر زائل کرنے کیلئے یہ قانون بنایا گیا ہے۔

ایوان نے چاروں صوبوں اوروفاق میں ایک ہی روزانتخابات کرانےکی قرارداد بھی منظور کرلی ۔ جس کے بعد پارلیمنٹ کامشترکہ اجلاس 15مئی شام4 بجے تک ملتوی کردیا گیا۔

یاد رہے کہ سپریم کورٹ پریکٹس اینڈ پروسیجر بل کے تحت سو موٹو نوٹس لینے کا اختیار اب اعلیٰ عدلیہ کے 3 سینیئر ترین ججز کے پاس ہو گا۔ بل کے تحت چیف جسٹس کا ازخود نوٹس کا اختیار محدود ہوگا، بینچوں کی تشکیل اور از خود نوٹس کا فیصلہ ایک کمیٹی کرے گی جس میں چیف جسٹس اور دو سینئر ترین ججز ہوں گے۔