صدر مملکت کی اسٹیٹ لائف کو شکایت کنندہ گان کا انشورنس کلیمز ادا کرنے کی ہدایت

صدر مملکت ڈاکٹر عارف علوی نے وفاقی محتسب کے فیصلے کے خلاف سٹیٹ لائف انشورنس کارپوریشن آف پاکستان کی طرف سے دائر تین الگ الگ اپیلوں کو مسترد کرتے ہوئے شکایت کنندہ گان کو 32 لاکھ روپے سے زائد کے انشورنس کلیمز ادا کرنے کی ہدایت کر دی۔

صدر مملکت نے اپنے فیصلے میں قرار دیا کہ تینوں معاملات میں سٹیٹ لائف کی جانب سے بدانتظامی ثابت ہو ئی ہے اس لئے وہ تینوں شکایت کنندگان کو انشورنس کلیمز ادائیگی کرے ۔ ایوان صدر کے پریس ونگ کے مطابق تین شکایت کنندگان بشمول ثمینہ شہزادی، محمد محفوظ اور سیتا کے خاندان کے افراد نے سٹیٹ لائف انشورنس کارپوریشن سے بالترتیب 29 لاکھ، 198,290 اور 192,000 روپے کی انشورنس پالیسیاں حاصل کی تھیں۔

صدر مملکت کی اسٹیٹ لائف کو تین شہریوں کو 32 لاکھ روپے کے انشورنس کلیمز ادا کرنے کی ہدایت

صدر مملکت ڈاکٹر عارف علوی نے اسٹیٹ لائف انشورنس کارپوریشن کی تین اپیلیں مسترد کر دی

تینوں معاملات میں اسٹیٹ لائف کی جانب سے بدانتظامی ثابت ہو ئی، صدر مملکت pic.twitter.com/BVGoZqUS27

— The President of Pakistan (@PresOfPakistan) May 3, 2023

شکایات کنندہ ثمینہ شہزادی کے معاملے میں، صدر نے قرار دیا کہ ان کے متوفی شوہر (محمد سعید احمد) کی موت سٹیٹ لائف انشورنس کارپوریشن کے دعوے کے برعکس دماغ کے ٹیومر سے نہیں بلکہ کوویڈ-19 کی وجہ سے ہوئی تھی۔ محمد محفوظ کے معاملے میں، صدر نے نشاندہی کی کہ پالیسی ان کی بہن (چاند بی بی) کو 26.12.2018 کو جاری کی گئی تھی اور وہ پالیسی حاصل کرنے کے 3 سال اور 7 ماہ سے زائد عرصہ کے بعد 19.12.2021 کو انتقال کر گئی تھیں۔ اسی طرح سیتا کے معاملے میں قرار دیا گیا کہ ان کے شوہر کو 31.12.2018 کو پالیسی جاری کی گئی تھی جو پالیسی حاصل کرنے کے 2 سال اور 2 ماہ سے زائد عرصہ کے بعد 17.03.2021 کو انتقال کر گئے تھے۔

صدر مملکت نے اس بات پر روشنی ڈالی کہ انشورنس آرڈیننس 2000 کے سیکشن 80 کے مطابق، آرڈیننس کے آغاز کی تاریخ کے بعد لائف انشورنس کی کسی پالیسی پر دو سال کی مدت ختم ہونے کے بعد سوال نہیں اٹھایا جا سکتا جبکہ ان دونوں معاملوں میں سٹیٹ لائف کے فیلڈ افسران کی خفیہ رپورٹس نے پالیسی کے اجراء کے وقت پالیسی ہولڈرز کو صحت مند قرار دیا تھا ۔ صدر مملکت اپنے فیصلے میں قرار دیا کہ تینوں معاملات میں سٹیٹ لائف کی جانب سے بدانتظامی ثابت ہوئی ہے اس لیے اس کی اپیلوں کو مسترد کیا جاتا ہے لہذا سٹیٹ لائف تینوں شکایت کنندگان کو موت کے بیموں کی رقم ادا کرے