سعودی فضائی کمپنیوں کا حج سیزن کیلئے آپریشنل پروگرام جاری

جدہ: سعودی عرب کی فضائی کمپنیوں کے گروپ نے رواں سال حج سیزن 1444ھ کے لیے اپنا آپریشنل پروگرام جاری کردیا،عازمین کو سو سے زیادہ شیڈول اور14سیزنل ہوائی اڈوں سے سفر حج کرایا جائے گا۔

سعودی خبررساں ادارے کے مطابق سعودی عریبین ایئرلائنز (السعودیہ) ادیل ایئر اور پرائیویٹ سعودی ایئرلائن کے ذریعے رواں برس دنیا کے مختلف ممالک سے 12 لاکھ سے زیادہ عازمین حج کے لیے 164 طیارے مخصوص کیے ہیں۔

عازمین حج کو سو سے زیادہ شیڈول ہوائی اڈوں اور 14 سیزنل ہوائی اڈوں سے سفر حج کرایا جائے گا۔ سعودی فضائی کمپنیوں نے گزشتہ دنوں متعدد ممالک کے حج اداروں کے ساتھ اس ضمن میں معاہدے کیے ہیں۔

سعودی عریبین ایئرلائنز (السعودیہ) نے حج پروازوں سے سفر کرنے والوں کے لیے سپیشل اسلامی آگہی سروس کا بھی اہتمام کیا ہے۔

عازمین کو مذہبی پروگرام اور حج سے متعلق آگہی فراہم کی جائے گی، 134 گھنٹے سے زیادہ دورانیے پر مشتمل مختلف دینی پروگراموں کا انتظام اور 590 گھنٹے کی قرآن کریم کی تلاوت کا بھی بندوبست کیا گیا ہے۔

اسلامی پروگرام عربی کے علاوہ انگریزی، انڈونیشی اور چینی زبانوں میں پیش کیے جائیں گے۔ عازمین حج کے لیے دیگر زبانوں میں بھی دینی پروگراموں کا انتظام کیا گیا ہے۔