پاکستان اقلیتوں کے حقوق کے تحفظ کو سب سے زیادہ اہمیت دیتا ہے:پاکستانی سینیٹرز

واشنگٹن: امریکہ کے دورے پر آئے سینیٹر دنیش کمار پالیانی اور سینیٹر گردیپ سنگھ نے کہا ہے کہ پاکستان اقلیتوں کے حقوق کے فروغ و تحفظ اور انہیں قومی دھارے میں شامل کرنے کو انتہائی اہمیت دیتا ہے۔

پاکستان ہائوس واشنگٹن میں امریکہ میں پاکستان کے سفیر مسعود خان کی میزبانی میں منعقدہ ایک تقریب انہوں نے کہا کہ بین المذاہب ہم آہنگی ہماری ترجیح ہے اور ہم اس سمت میں بھرپور کوششیں کر رہے ہیں۔

سفیر مسعود خان نے پاکستانی نژاد امریکی اقلیتی رہنمائوں کی جانب سے کی جانے والی کوششوں کا اعتراف کیا جو پاکستان اور امریکہ کے درمیان پل کا کردار ادا کر رہے ہیں۔

مسعود خان نے سینیٹرز کو امریکی محکمہ خارجہ اور امریکی کمیشن برائے بین الاقوامی مذہبی آزادی (یو ایس سی آئی آر ایف) کے ساتھ پاکستان کے جاری مذاکرات کے بارے میں بھی آگاہ کیا۔ سینیٹر کمار اور سینیٹر سنگھ نے اقلیتوں کے حقوق کے تحفظ اور ان کو قومی دھارے میں لانے کے لئے مختلف حکومتوں کی جانب سے کی جانے والی قانون سازی، انتظامی اور قانونی اقدامات پر روشنی ڈالی۔

انہوں نے کرتارپور راہداری کھولنے، مندروں اور ملک بھر میں دیگر مذہبی مقامات کی بحالی سمیت حکومت ِ پاکستان کی جانب سے کیے گئے مختلف اقدامات کا ذکر کرتے ہوئے کہا کہ یہ اقدامات اقلیتوں کے حوالے سے مضبوط حکومتی عزم کے عکاس ہیں۔