وزیراعظم نے نوشہرہ میں کم لاگت ہاؤسنگ اسکیم کا سنگ بنیاد رکھ دیا

تفصیلات کے مطابق وزیر اعظم عمران خان نے اس موقع پر اظہار خیال کرتے ہوئے کہا کہ نیا پاکستان ہاؤسنگ پروگرام ملک بھر میں شروع کیا گیا ہے تاکہ محنت کشوں اور مزدوروں سمیت معاشرے کے محروم طبقات کے بھی اپنے گھر ہو سکیں۔وزیر اعظم نے کہا کہ ایک طرف ہم لوگوں کو سستے گھر فراہم کرنے کیلئے حکومت کی زمین پر گھر اور فلیٹ تعمیر کر رہے ہیں۔اس سکیم کے تحت ہم نے لوگوں کا اندراج کیا ہے اور ہر گھر پر تین لاکھ روپے کی اعانت فراہم کر رہے ہیں۔انہوں نے کہا کہ اسی طرح بینک آسان اقساط پر قرضے فراہم کر رہے ہیں تاکہ لوگ اپنے گھر تعمیر کر سکیں۔

وزیراعظم  نے مزید کہا کہ ہم نے پوری کوشش کی ہے کہ سرکاری زمین پر سستے گھر بنیں، ہر گھر پر 3 لاکھ روپے سبسڈی دے رہے ہیں، گھر کے قرضے پر صرف 3 فیصد سود دینا پڑے گا۔عمران خان نے یہ بھی کہا کہ ہاؤسنگ منصوبے میں دیر اس لیے ہوئی کہ بینک قرضے دینے کو تیار نہیں تھے، قانون 11 سال سے عدالت میں پھنسا ہوا تھا۔

وزیراعظم  نے کہا کہ غریب کیلئے احساس اور قانون کی حکمرانی ریاستِ مدینہ کا بنیادی فلسفہ تھا جس کی بنیاد ہمارے پیغمبر حضرت محمد ۖ خاتم النبین نے رکھی تھی۔انہوں نے کہا کہ حکومت معاشرے کے غریب طبقات کو تحفظ فراہم کرنے کی ہر ممکنہ کوشش کر رہی ہے۔وزیر اعظم نے پناہ گاہوں اور کوئی بھوکا نہ سوئے سکیم کا دائرہ کار مزید وسیع کرنے کے عزم کا بھی اظہار کیا۔

انہوں  نے مزید کہا کہ چینی سمیت ہر شعبے میں مافیا ہے جس نے منافع کمانے کیلئے اشیائے ضروریہ کی قیمتوں میں اضافہ کیا۔انہوں نے کہا کہ ہماری کوشش طاقتور لوگوں کو قانون کے شکنجے میں لانا ہے۔