پاکستان جلد ہی سیاسی و معاشی بحران پر قابو پا لے گا:خواجہ محمد آصف

اسلام آباد: وزیر دفاع خواجہ محمد آصف نے کہا ہے کہ پاکستان جلد ہی سیاسی و معاشی بحران پر قابو پا لے گا۔

الجزیرہ کے ساتھ اپنے ایک انٹرویو میں انہوں نے کہا کہ تحریک انصاف کے مسلح جتھوں نے 9 مئی کو راولپنڈی میں عسکری تنصیبات پر حملے کئے۔

انہوں نے کہا کہ مسلم لیگ (ن) کے رہنمائوں نے گرفتاری کے باوجود تشدد کا راستہ اختیار نہیں کیا۔ انہوں نے کہا کہ ہماری پارٹی نے کبھی فوجی تنصیبات پر حملہ نہیں کیا۔وزیر دفاع نے کہا کہ فوجی تنصیبات پر حملہ کرنے والے ملک کے دشمن ہیں۔ انہوں نے کہا کہ یہ کارروائیاں پاکستان کے خلاف جنگ کے مترادف ہیں۔

خواجہ محمد آصف نے کہا کہ فوجی تنصیبات، فوجی اڈوں اور فوجی حکام کی رہائش گاہوں پر حملوں میں ملوث افراد کے خلاف آئین کے مطابق آرمی ایکٹ کے تحت مقدمات چلائے جائیں گے۔ انہوں نے کہا کہ عام انتخابات رواں برس اکتوبر میں اپنے مقررہ وقت پر ہوں گے۔