میرے گھر پر دہشت گردوں کے قیام کی بات درست نہیں: عمران خان

لاہور: چیئرمین تحریک انصاف عمران خان نے کہا ہے کہ کورکمانڈر ہاؤس پر حملے سے پاکستان کی بدنامی ہوئی، ایسا نہیں ہونا چاہیے، میرے گھر پر دہشت گردوں کے قیام کی بات درست نہیں۔

نجی ٹی وی کے مطابق  کمرہ عدالت میں صحافیوں سے غیر رسمی گفتگو کے دوران سابق وزیراعظم عمران خان کا کہنا ہے کہ جس جماعت کا ووٹ بینک ہو اسے ہرایا نہیں جا سکتا۔ اتنے بڑے ووٹ بینک والی جماعت میں سے کوئی جائے یا کوئے آئے، فرق نہیں پڑتا۔

ملک میں بنیادی حقوق ختم ہو کر رہے گئے ہیں، خوف کی فضا میں ملک نہیں چل سکتا، پی ڈی ایم کے اقدامات اور انسانی حقوق کی خلاف ورزیوں سے ملک کی بدنامی ہوئی، 7 ہزار لوگوں کو گرفتار کر کے پی ڈی ایم حکومت خود پھنس گئی، اسی بنیاد پر کہا تھا کہ ایک ہفتے میں معاملات درست ہو جائیں گے۔ 

انہوں نے کہا کہ جو کریک ڈاؤن اب ہو رہا ہے مشرف دور میں بھی ایسا نہیں ہوا، یکطرفہ مذاکرات نہیں ہو سکتے، ہم تو 11 ماہ سے مذاکرات کی بات کر رہے ہیں۔

کورکمانڈر(جناح) ہاؤس لاہور پر حملے کی پہلے بھی مذمت کی تھی، اب بھی کی ہے۔ کون ہے جو جناح ہاؤس پر حملے کی مذمت نہیں کرتا، ہر پاکستانی جناح ہاؤس پر حملے کی مذمت کرتا ہے۔

عمران خان کا کہنا تھا کہ میرے گھر میں دہشت گردوں کے ٹھہرنے کی بات غلط ہے، میڈیا کو اپنا گھر کھول کر دکھا دیا ہے۔