گوجرانوالہ میں آئل ٹینکرز میں آگ لگنے سے 5 افراد جھلس گئے

گوجرانوالہ: گوجرانوالہ میں ہفتے کے روز غیر قانونی آئل گودام میں کھڑے آئل ٹینکرز میں آگ لگنے سے 5 افراد جھلس کر زخمی ہوگئے۔

آتشزدگی کا واقعہ سیالکوٹ بائی پاس کے قریب مافی والا میں واقع آئل گودام میں پیش آیا جہاں ایک آئل ٹینکر میں اچانک آگ لگ گئی اور چند ہی لمحوں میں مزید دو آئل ٹینکر اور قریبی پلاسٹک فیکٹری کو لپیٹ میں لے لیا۔

آگ لگنے کے نتیجے میں گودام میں کام کرنے والے 5 افراد زیل شاہ، اکرم، شوکت، سجاد اور شاکر جھلس کر زخمی ہوگئے، جنہیں ریسکیو اہلکاروں نے تشویشناک حالت میں اسپتال منتقل کردیا۔

تاہم اسپتال میں برن سینٹر کی عدم دستیابی کے باعث تمام زخمیوں کو لاہور جنرل اسپتال ریفر کردیا گیا ہے۔

دوسری جانب ریسکیو اہلکاروں نے تین گھنٹے کی فائر فائٹنگ آپریشن کے بعد آگ پر قابو پالیا جس میں ریسکیو کی 10 گاڑیوں نے حصہ لیا۔

قریبی فیکٹری میں موجود لاکھوں روپے مالیت کا پٹرول اور پلاسٹک کا دانہ جل کر راکھ ہو گیا۔ تاہم پولیس نے واقعے کی تحقیقات شروع کردی ہیں۔