واٹس ایپ کا نئی پالیسی کے سلسلے میں نوٹیفکیشنز بھیجنے کا سلسلہ پھر شروع

تفصیلات کے مطابق واٹس ایپ نے نئی پالیسی قبول کرنے کے نوٹیفکیشن بھیجنے کا سلسلہ پھر شروع کر دیا ہے، یہ نوٹیفکیشن ان صارفین کو بھیجے جا رہے ہیں جنھوں نے اسے قبول نہیں کیا تھا، دنیا بھر میں شدید رد عمل کے باعث پرائیویسی پالیسی کا اطلاق 15 مئی تک ملتوی کر دیا گیا تھا۔

واٹس ایپ بیٹا انفو ویب سائٹ کے مطابق کمپنی کی جانب سے صارفین کو بتایا جا رہا ہے کہ نئی پالیسی اور اصول و ضوابط کا اطلاق 15 مئی سے ہوگا۔

نوٹیفکیشن میں یہ بات  واضح کی گئی ہے  کہ واٹس ایپ میں تمام چیٹس اینڈ ٹو اینڈ انکرپٹڈ ہوں گی،واٹس ایپ نے واضح کیا ہے کہ ہم صارفین کی نجی گفتگو کو نہ پڑھ سکتے ہیں اور نہ سن سکتے ہیں،صرف شرکا ہی انھیں دیکھ اور سن سکتے ہیں۔ کیوں کہ یہ اینڈ ٹو اینڈ انکرپٹڈ ہے اور اسے کبھی تبدیل نہیں کیا جائے گا۔

فروری میں ایک رپورٹ میں چندتفصیلات سامنے آئیں تھیں  اگر کمپنی کے مطالبے پر بھی صارفین کی جانب سے نئی پالیسی کو تسلیم نہیں کیا گیا تو مختصر مدت کے لیے وہ افراد کالز اور نوٹیفکیشن تو موصول کر سکیں گے مگر ایپ میں میسجز بھیج یا پڑھ نہیں سکیں گے۔

واضح رہے کہ واٹس ایپ نے رواں برس جنوری میں صارفین کو نئی پرائیویسی پالیسی سے متعلق نوٹیفکیشنز بھیجے تھے، جن میں کہا گیا تھا کہ نئی پالیسی کا نفاذ 8 فروری سے ہوگا تاہم لوگوں کے شدید رد عمل پر اس پالیسی کا اطلاق 15 مئی تک ملتوی کر دیا گیا تھا۔